[A:29]bstan pa'i mnga' bdag sgrub khang pa dpal ldan don grub kyis mkhan po/ /sde snod gsum dang rgyud sde bzhi la mi 'phrogs pa'i mkhyen rab dang ldan pa'i gnas brtan 'dul ba 'dzin pa chen po brang ti pa nam mkha' sangs rgyas kyis las kyi slob dpon/ mkhas grub shar chen shes rab 'byung gnas kyis gsang ston/ dad pa'i dge 'dun grangs tshang ba'i dbus su bar ma rab byung zhu ba nas bzung bsnyen rdzogs kyi dus sgo brjod pa'i bar 'dul lung rgya bod kyi rnam bshad rnams kyi dgongs pa bzhin grangs gsum du gcod pa sogs phyag len shin tu dngos gtsang ba'i sgo nas khrag skyug ces pa shing phag chu stod zla ba'i gza' skar 'phrod sbyor dge ba'i tshe yongs su rdzogs pa dge slong gi dngos po rnam par dag pa bzhes te nyon mongs pa'i g.yul las rnam par rgyal ba'i rgyal mtshan bsgreng ba ni/ sum brgya par/ nyon mongs dgra g.yul rgyal byed tshul khrims te/ /nges par 'byung ba'i tshul khrims sdug bsngal spong / /dpal 'byor sa dang me tog mda' can 'joms/ /rdzogs pa'i byang chub dpal snod dbang bskur ro/ /zhes pa'i don thog tu babs shing mkhan slob khungs btsun de dag 'bad pas 'tshol ba'ang rdo rje 'chang tshar chen gyis/ /deng dus 'di na kha cig gzhan dbang gis/ /rang yul bla ma tshul 'chal dag la nod/ /gzhan dag bsams bzhin thag ring sar bgrod nas/ /chen po hor 'dra'i spyod tshul can la zhu/ /bdag gis tshe 'di'i ngo srung rgyab tu bor/ /phyi ma'i don chen 'ba' zhig snying nas bsams/ /yongs rdzogs kha che'i paN