[A:༣]སྣ་མང་སྤྲུལ་པའི་ཟློས་གར་བསྒྱུར་ལས་ཞིང་འདིར་མཁས་གྲུབ་ཚུལ་བསྟན་ནས། །ཐུབ་པའི་རིང་ལུགས་རྒྱལ་མཚན་བསྒྲེང་མཛད་དཔལ་ལྡན་སྐལ་པ་བཟང་པོར་བསྔགས། །འཕོ་མེད་གཙུག་ཏོར་རྩེར་བཅིངས་བདེ་ཆེན་ཝཾ། །སྟོང་ཆེན་ཨེ་དབྱིངས་སྣ་ཚོགས་ལྷ་མོ་དང༌། །མཉམ་སྦྱོར་ཀཱ་ལ་ཙཀྲ་བཤེས་གཉེན་དུ། །སྟོན་པའི་འཁྲུལ་པོ་ཆེ་གཞན་དམིགས་སུ་མེད། །ཚུལ་དེ་ལེགས་པའི་ཆ་བསགས་གྲོང་ཁྱེར་ན། །དཔལ་ལྡན་རྒྱུ་སྐར་འཁོར་ལོར་སྐལ་ཅན་རྣམས། །སྨིན་མཛད་འཇམ་དབྱངས་གྲགས་སྙན་འབར་བའི་ལྷ། །ལྗོངས་འདིའི་ཤིང་རྟ་ཆེན་པོར་བསྟན་ནམ་སྙམ། །ཡང་ན་བདག་མེད་མཁའ་འགྲོའི་གསང་མཛོད་ཀུན། །ཉེར་འཛིན་རྣལ་འབྱོར་དབང་ཕྱུག་རིང་ལུགས་སྲོག །ཟུངས་སུ་ཤར་ཕྱོགས་སློབ་དཔོན་ཀརྞ་ཀཿ །བྱོན་ཏམ་བློ་འདི་སོམ་ཉིའི་དྲྭ་བར་ཆུད། །གཅིག་ཏུ་དཀར་བའི་ཐུབ་བསྟན་ཁ་བའི་རི། །ལོག་རྟོག་ན་བུན་བསངས་ནུས་རྣམ་དཔྱོད་ཉིད། །མ་ཕམ་བླ་མའི་རིང་ལུགས་བ་ཀཱུ་ལ། །འབྱེད་པའི་གཡོན་མིག་འགྲམ་ཆང་ད་གདོད་འཐོར། །རྒྱལ་སྲས་སློབ་མའི་ཚོགས་ཀྱིས་མགྲིན་གཅིག་གླུ། །ཉེར་བླངས་གདུགས་དང་བ་དན་རོལ་མོར་