[A:༤]བཅས། །བུ་སྟོན་ཆོས་རྗེའི་བཤད་སྒྲུབ་བདག་པོ་རུ། །མགོན་ཁྱོད་མངའ་གསོལ་ཆེད་དུ་དབང་བསྐུར་ངེས། །ལྷུན་པོའི་རྩེ་མོར་རྣམ་པར་སྣང་མཛད་ཀྱིས། །ཡོངས་སྤྲུལ་གཞའ་ཚོན་ལྟར་བཀྲའི་གཞལ་མེད་ཁང༌། །གངས་ཅན་དངས་མཚོར་སྒྲིབ་བྲལ་འཆར་ནུས་དིང༌། །རྡོར་སེམས་ངོ་བོ་མི་གཏོང་ཁྱོད་གཅིག་པུ། །གང་བློ་ཡངས་པའི་མངལ་དུ་མཁས་གྲུབ་ཀྱི། །ཡོན་ཏན་གསེར་སྒོང་སྨིན་པའི་རྟོགས་བརྗོད་ཚད། །འཛིན་ལ་ཁྱབ་འཇུག་རིག་སྩལ་ཆེན་པོའི་མཐའ། །འཛད་ན་བདག་འདྲས་བརྗོད་པའི་ཁུར་དེ་ལྕི། །བསམ་གཏན་པར་བཅོས་འགོག་པའི་ཏིང་འཛིན་མཁན། །རྟོག་གེའི་ཚིག་མདས་ངེས་པའི་དོན་སྙིང་འབིགས། །ཆེར་རློམ་འཕྱོན་མའི་སྤྱོད་ཚུལ་གླེང་མཐོང་ཚེ། །སྒྱིད་པ་མི་སྐྱུར་གཟེངས་བསྟོད་སེམས་དེ་སྤྲོ། །རྫུན་ཕྲ་རྩུབ་ཀྱལ་སེར་བས་ཕན་བདེའི་ལོ། །འཇོམས་འདྲེན་ལྕེ་ཡི་གློག་ཞགས་མང་འཁྱུག་མོད། །གཏན་འདུན་མྱུ་གུ་བསྐྱེད་ནུས་ངོ་མཚར་གཏམ། །ཆུ་འཛིན་ལང་ལོང་གཡོ་བ་བརྒྱ་ལམ་ཙམ། །དེ་ཕྱིར་གདན་གསུམ་ཚང་པའི་ཧེ་རུ་ཀཿ །བཤེས་གཉེན་སྒྱུ་དྲར་རོལ་བའི་ཐུན་མོང་གི །རྣམ་ཐར་ནོར་འཛིན་གཞི་ལས་སོར་མོའི་རྩེས། །བླངས་པའི་རྡུལ་གྱི་གྲངས་ཙམ་བཤད་ཀྱིས་ཉོན། །དེ་ཡང་མཁས་འཇུག་ལས། བསྟན་བཅོས་བྱེད་པའི་དམ་པ་ཡིས། །སྟོན་པ་ལ་ནི་མཆོད་བརྗོད་བྱ། །བསྟན་པ་སྤེལ་ཕྱིར་དག་པའི་ཚིག །འདི་ལ་འཐད་པ་བཟང་པོ་མཐོང༌། །ཞེས་པ་ལྟར་ཡུལ་ཁྱད་པར་ཅན་ལ་ཆེད་དུ་བརྗོད་པའི་ཚིགས་སུ་བཅད་པ་ཏམྦཱུ་རའི་རྒྱུད་ལས་ཉེ་བར་དྲངས་ཏེ་སྐབས་སུ་གླེང་བར་བྱ་བ་ནི། མགོན་པོ་ཞི་བ་ལྷས། འགྲོ་བའི་སྡུག་བསྔལ་