[A:༤༡]པར་ཞལ་གྱིས་འཆེས། །དོན་མེད་འདུ་འཛིའི་རྣམ་གཡེང་རྒྱབ་བསྐྱུར་ནས། །དོན་ཆེན་རྒྱུད་སྡེར་བཅུ་ཕྲག་བགྲང་བྱའི་བར། །དོན་ཚིག་ཀུན་སྦྱངས་མཁས་པའི་རྩེར་སོན་པས། །དོན་ལྡན་དལ་བའི་རྟེན་ལ་སྙིང་པོ་བླངས། །འཚུབ་འཚུབ་ལྷ་མིའི་གདོན་གྱི་དམག་གི་དཔུང༌། །ལོང་ལོང་སྟུག་པོའི་སྤྲིན་ནག་ལྟར་འཐིབས་པ། །འཇིགས་འཇིགས་མ་ཧེའི་ཞལ་ཅན་དབང་རབ་ཀྱི། །འུར་འུར་ཐུགས་རྗེའི་རླུང་གིས་ཕ་མཐར་བསྐྲད། །རྨི་ལམ་སྤྲུལ་བསྒྱུར་སྔོན་ནས་གོམས་པའི་མཐུས། །འཁོར་བའི་མཚོ་ལས་འགྲོ་འདྲེན་ལྷག་བསམ་དང༌། །མཐའ་ཀླས་དག་པ་རབ་འབྱམས་ཞིང་ཁམས་ལ། །གཅིག་ཏུ་གཟིགས་མོར་གཡེངས་པ་དེ་རྨད་བྱུང༌། །ཞབས་རྡུལ་བྱང་གླིང་ཆོས་རྗེའི་ཁྲིར་བཀོད་ནས། །སྨིན་གྲོལ་གར་ཐིག་དབྱངས་དང་དུས་ཀྱི་ཆོས། །བྱ་བ་ལས་ཀྱི་འཁོར་ལོས་བུ་སྟོན་རྗེའི། །བསྟན་པའི་ཉི་མ་གཉིས་པ་དེང་འདིར་ཤར། །སྐུ་ཚེའི་ཚད་སོགས་ལྐོག་གྱུར་ཤེས་བྱའི་གཟུགས། །གནས་གསར་བླ་མའི་ཐུགས་ཀྱི་མེ་ལོང་དུ། །གསལ་བར་མགོན་ཁྱོད་དད་པ་དབྱར་གྱི་མཚོ། །འཕྱུར་བའི་རྩེ་མོ་ཚངས་པའི་ཡུལ་ས་བརྒལ། །ཐུན་འཚམས་གོས་ཀྱི་ཕང་དུ་ཟླ་བཞིན་མ། །རྩེ་དགའ་རྒོད་པའི་མཁན་པོ་ཟལ་བྲག་པ། །འཇམ་མཉེན་གཞན་སྣང་འདྲིད་པའི་མེ་ཏོག་མདའ། །འཕང་པའི་ཆོ་ག་མ་རྫོགས་བསྟན་པའི་གསོས། །ཤིང་ཕག་ལོ་རྗེ་རྡོ་རྗེ་འཆང་མཇལ་བར་ཕེབས་རིང་ཞིག་བཞུགས་ཤིང་བརྟན་བཞུགས་ཀྱི་གསོལ་འདེབས་མཛད། ཚུར་འབྱོན་ཁར་སླར་ཡོང་ཐུབ་ངེས་གྱིས་གསུང་ཞིང་རྗེ་འདི་ཉིད་ཀྱི་ཕྱག་གཡས་ན་རྡོ་རྗེ་