[A:༤༣]སྣ་ཚོགས་བྱུང་བ་དང་དབྱིབས་འདྲ་བསམ་པ་མང་ཙམ་གསུངས་མཐར་གསུང་ཤེད་ཆེན་པོས་ཆོས་རྗེ་དབོན་ལ་དཔལ་མཆོག་ང་སློང་དང་གསུང༌། དབོན་པོས་སྐུ་སྐྱོར་ནས་ཙོང་མཛད་པ་རྗེ་ཉིད་ལ་སྤྱན་ཅེར་གཟིགས་ནས་ད་མང་པོ་ལབ་མི་ཐུབ་པ་འདུག་ཀུན་མཁྱེན་བུ་སྟོན་རིན་པོ་ཆེའི་བསྟན་པ་ཁྱེད་ལ་ཁག་ཡོད་དོ་ཕེབས་པ་གསུང་གི་ཐ་མ་ཡིན་གསུང༌། ཧོར་ཟླ་བཅུ་པའི་ཚེས་བཞི་ལ་ངོར་དུ་མཁས་གྲུབ་དཔལ་ལྡན་དོན་གྲུབ་མཁའ་སྤྱོད་ཀྱི་ཞིང་དུ་གཤེགས་པའི་གཏམ་ངན་ཞ་ལུ་ཕུའི་བསམ་གཏན་སྒང་དུ་བྱུང་འཕྲལ་རི་ཕུག་ཏུ་ཕེབས་ནས་མཆོད་འབུལ་བ་རྫོང་བདའ་མཛད། ཚེས་གཉིས་ལ་འདར་དུ་རྡོ་རྗེ་འཆང་དགྱེས་མཛད་རྡོ་རྗེའི་ཐུགས་ཀར་བསྡུས་པའི་གནས་ཚུལ་དང་བཅས་ཞབས་དྲུང་དབོན་རིན་པོ་ཆེའི་ཕྱག་ཐམ་ཐུགས་དམ་གསལ་འདེབས་སྐྱེལ་མི་འབྱོར་གཤིས་བཀའ་དྲིན་ཆེ་ཤོས་ཀྱི་བླ་མ་གཉིས་ཀ་གཤེགས་པས། བཀའ་ལས། བླ་མ་གཉིས་ཀ་དང་བྲལ་བས་སྡུག་པ་ལ་ཚོད་མ་བྱུང་གསུང༌། དེ་འཕྲལ་ནོར་གླིང་ནས་ཆིབས་དྲེལ་གཡར་ངོས་ཨེ་ཝཾ་ཆོས་ལྡན་དུ་ཁྱབ་བདག་བླ་མ་དམ་པའི་སྐུ་གདུང་རིན་པོ་ཆེ་མཇལ་བ་དང་གདུང་འབུལ་ཕུལ་ནས་རྩོལ་ཁྱད་ཀྱིས་འདར་ལ་ཕེབས་སྐབས་རྒྱང་གཟིགས་ནས་འཇའ་དཀར་པོ་སྣམ་བུ་བརྐྱང་པ་ལྟ་བུ་གྲང་མོ་ཆེའི་གདུང་གི་ཐད་དུ་ཟུག །གདུང་འབུལ་འབུལ་བ་གནང་ཞིང་བཞུགས་རིང་གདུང་ཡིད་བཞིན་གྱི་ནོར་བུའི་དྲུང་དུ་སྟན་ཆགས་ནས་གདན་གསུམ་ཚང་བའི་དཀྱིལ་འཁོར་གྱི་བདག་ཉིད་ལ་མཆོད་འབུལ་གསོལ་འདེབས་དབང་བཞི་ལེན་པ་སོགས་རྒྱས་པར་གནང༌། ཐུགས་ངལ་ཤིན་ཏུ་ཆེ་བར་ཁྱབ་བདག་བཀའ་འགྱུར་བ་ཆེན་པོས་