[A:༤༥]བསྒྲགས་ཤིང་དབུ་མཛད་བསྐྱར་བསྐོ་མཛད། དེ་ནས་གྲ་པ་ཧྲགས་བསྡུས་ལ་གཞུང་ནས་ཕོགས་སོགས་མཐུན་རྐྱེན་གནང་སྟེ་བྱ་ཚོར་ཟླ་གཅིག་གི་བར་ས་གར་མཆོད་གར་རྣམས་ལ་སྦྱོང་དར་གྱི་དོ་དམ་གནང༌། གྲུབ་བསྟུན་སྒྲུབ་མཆོད་དང་རྣམ་སྲས་མཆོད་པ་རྣམས་ཀྱི་གཟིགས་མོར་སྡེ་སྲིད་ཀྱང་ཕེབས་པའི་གྲ་འགྲིག་བྱུང་བའི་ལེགས་སོར་པ་རྣམ་ཙོ་བོ་གཞིས་ཀ་མཆོད་ཐེབས་སུ་སྦྱོར་འཇགས་བྱུང༌། སྔར་གཞིས་རྩེར་བཀའ་འགྱུར་གྱི་ཞུ་དག་ལ་བྱོན་སྐབས་ནས་ཆོས་འབྲེལ་གསན་འདུག་པ་དང་བཅས་དཔོན་སློབ་པཎ་ཆེན་རིན་པོ་ཆེར་བུ་སྟོན་རིན་པོ་ཆེས་མཛད་པའི་མདོ་ཕྱོགས་ཀྱི་གསུང་རབ་འགའི་ལུང་གསན། དེ་ནས་ཨེ་ཝཾ་ཆོས་ལྡན་དུ་ཕེབས་མཁན་ཆེན་ཐར་བརྩེ་བ་ནམ་མཁའ་སངས་རྒྱས་ལས་ས་པཎ་དང་འཕགས་པ་རིན་པོ་ཆེའི་བཀའ་འབུམ་གྱི་ལུང་སོགས་ཆོས་དུ་མ་གསན། བཞུགས་མཚེར་སྒྲུབ་ཁང་དུ་ཡོད་པར་ཐོ་རེངས་ཤིག་མནལ་ལམ་དུ་གུ་རུ་དྲག་པོའི་སྐུ་བརྙན་ཤིན་ཏུ་གསལ་བ་ཞིག་བྱུང་བ་ནམ་ལངས་ཚེ་ཐར་བརྩེར་དབང་ལ་བྱོན་གསུང་བའི་འཕྲོས་བྱུང་བ་ན་ཅི་ཡིན་ནམ་དགོངས་ཚེ་དབང་དེ་གཏེར་ཁ་གོང་མའི་དྲག་པོ་མེའི་སྤུ་གྲིའི་དབང་ཡིན་འདུག་གསུང་བ་དྲག་པོའི་སྐུ་དེ་ཡང་ཞལ་གཟིགས་མ་ལྟ་བུ་ཞིག་ཡིན་ནམ་སྙམ། འདི་ལོ་ཞ་ལུའི་མཁན་ཐོག་ཏུ་རིན་པོ་ཆེ་ཤར་པ་བྱོན་ནས་མི་རིང་བར་ངོར་ཚོགས་ཆེན་ལ་འཕྲེང་བ་ཞེ་ལྔ་མའི་དབང་གནང་བ་དང་དེར་མ་ཟད་དབང་ཆོས་ཀྱི་རིགས་རྒྱས་པར་གསན། ཡོ་ག་མ་ལས་བུ་དགའ་བ་དབང་ལྡན་ཆོས་འཁོར་དུ་མཁས་མཆོག་བསྟན་པའི་སྒྲོན་མེས་གདན་དྲངས་དཔལ་མཆོག་རིགས་བསྡུས་ཀྱི་དབང་