[A:༥]སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་སྟི་དང༌། །བཅས་ཏེ་ཡུན་རིང་གནས་གྱུར་ཅིག །ཅེས་ལུས་ཅན་རྣམས་རྒྱུ་ཀུན་འབྱུང་ལས་ཉོན་གྱི་བདེན་པ་ལས་འབྲས་བུ་སྡུག་བསྔལ་བདེན་པ་འབྱུང་བའི་ཟུག་རྔུ་རྩ་བ་ནས་འབྱིན་པར་བྱེད་པའི་རྩི་སྨན་གྱི་ལྗོན་པ་ཆེན་པོ། རྒྱུ་ལམ་གྱི་བདེན་པ་ལས་འབྲས་བུ་འགོག་པའི་བདེན་པའི་ཞར་ལ་གནས་སྐབས་སྲིད་པའི་བདེ་བ་རྣམས་ཀྱང་འབྱུང་བའི་སྒོ་གཅིག་པུ་ས་གསུམ་གྱི་སྒྲོན་མེ་སངས་རྒྱས་བཅོམ་ལྡན་འདས་ཀྱི་བསྟན་པ་རིན་པོ་ཆེ་ཡིན་ལ། དེ་ཡང་སངས་རྒྱས་ཕལ་པོ་ཆེ་ལས། ནམ་མཁའི་མཐར་ཐུག་གྱུར་པ་ཇི་ཙམ་པ། །སེམས་ཅན་མ་ལུས་མཐའ་ཡང་དེ་བཞིན་ནོ། །ཞེས་ནམ་མཁའི་མཐའ་ཁྱབ་པ་དེ་སྙེད་ལྟར་སེམས་ཅན་གྱི་ཁམས་ཀྱང་ཟད་པ་མེད་པས་འགྲོ་བ་རྣམས་འདྲེན་པའི་ཆེད་དུ་འདས་པ་དང་མ་བྱོན་པ་དང་ད་ལྟར་བཞུགས་པའི་སངས་རྒྱས་ཀྱི་གྲངས་ཀྱང་འདི་ཙམ་མོ་ཞེས་བློའི་ར་བ་ལས་ཡོངས་སུ་བརྒལ་ལ། འོན་ཀྱང་ལྷ་རྣམས་ཀྱིས་འདི་ནི་བསྐལ་པ་བཟང་པོའོ་ཞེས་པའི་ཆེད་དུ་བརྗོད་པའི་གྲགས་ཅན་གྱི་བསྐལ་པ་འདི་ལ་སངས་རྒྱས་སྟོང་ངམ་སྟོང་དང་ལྔ་ཚང་བར་འབྱུང་བའི་བཞི་པ་འོ་སྐོལ་གྱི་རྣམ་འདྲེན་ཟས་གཙང་གི་སྲས་པོ་འདི་ཉིད་རྒྱུད་བླ་མར། ཐུགས་རྗེ་ཆེན་པོས་འཇིག་རྟེན་མཁྱེན། །འཇིག་རྟེན་ཀུན་ལ་གཟིགས་ནས་ཀྱང༌། །ཆོས་ཀྱི་སྐུ་ལས་མ་གཡོས་པར། །སྤྲུལ་པའི་རང་བཞིན་སྣ་ཚོགས་ཀྱིས། །སྐྱེ་བ་མངོན་པར་སྐྱེ་བ་དང༌། །དགའ་ལྡན་གནས་ནས་འཕོ་བ་དང༌། །ལྷུམས་སུ་ཞུགས་དང་བལྟམས་པ་དང༌། །བཟོ་ཡི་གནས་ལ་