[A:༦༨]གྲ་མང་ཞིག་ལ་རབ་བྱུང་བསྙེན་རྫོགས་སྩལ། བཀྲ་ཤིས་ལྷུན་པོར་དཔོན་སློབ་པཎ་ཆེན་རིན་པོ་ཆེ་མཇལ་བར་ཕེབས་པའི་ཇ་གྲལ་གྱི་སར་བླ་མ་རབ་འབྱམས་པར་བཀའ་འགྱུར་གྱི་ལུང་ཡོད་ཚུལ་སྙན་འབུལ་མཛད་པར་ཀརྨ་པ་རང་བྱུང་རྡོ་རྗེས་གཡག་སྡེ་པཎ་ཆེན་ལ་དབྱངས་གསལ་གྱི་རྗེས་གནང་བསྐུར་ནས་དེས་ཆོས་ཐམས་ཅད་ཐོབ་པར་འགྲོ་གསུངས་པར་གཞོགས་དྲུད་ནས་ཀར་ལུགས་པ་རྣམས་ཀྱིས་ལུང་མཛད་པ་ཡིན། བཀླགས་ལུང་ཁུངས་མ་དེང་སང་བོད་ན་མེད་ཚུལ་སོགས་བཀའ་ཕེབས་རྒྱས་པར་སྩལ། བྱམས་པ་གླིང་དུ་ཆོས་དབར་བཏེག་ཀུན་མཁྱེན་བུའི་ཉེ་གནས་བསོད་ནམས་གྲུབ་ཀྱིས་མཛད་པའི་གར་ཡིག་སྟེང་ནས་དུས་འཁོར་གྱིས་གར་དཔོན་ཚང་འཇམ་དབྱངས་ཀྱིས་ཕུལ་བ་བཞིན་སྦྱོང་བདར་དཔྱིས་ཕྱིན་པ་གནང༌། ལྷོ་བོད་ཀྱི་བདེ་གཟར་ཆེན་པོ་དེ་ལངས་པའི་ས་སྐྱོང་བསོད་ནམས་རབ་བརྟན་དཔུང་ཐོབ་ཏུ་རྒྱལ་རྩེར་ཕེབས་པ་མཇལ་བར་བྱོན། རི་ཕུག་གི་དུས་འཁོར་སྒྲུབ་མཆོད་ལ་ས་གར་སྦྱིན་སྲེག་མཆོད་གར་སོགས་ཀྱི་གར་དཔོན་དང་ཆོག་དཔོན་རྗེ་བླ་མ་འདི་ཉིད་ཀྱིས་གནང་དཀྱིལ་འཁོར་དེའི་སྟེང་སྙེ་མོ་རུའི་བླ་མ་སོགས་ཉེར་ལྔ་ལ་བདག་པོ་ཆེན་པོས་མཐའ་བརྟེན་པའི་དབང་རྫོགས་པར་སྩལ་ལོ། །རྒྱུད་སྡེ་རྣམ་བཞིའི་སྨིན་བྱེད་དབང་གི་སྒོ། །སྒོ་འཕར་བརྒྱ་ཕྲག་ཕྱེ་ཚེ་གདན་གསུམ་ཀུན། །ཀུན་ནས་ཚང་བའི་མགོན་ཁྱོད་འོག་མིན་ཞིང༌། །ཞིང་ཁམས་རྒྱ་མཚོའི་གཙོ་བོར་ད་གདོད་འཁུམས། །སྤས་པའི་རྣལ་འབྱོར་མ་དངོས་གྲུ་འཛིན་དུ། །གཤེགས་ལ་ལྟོས་པ་མིན་ཀྱང་རྗེས་འཇུག་རྣམས། །ཚོགས་ཆེན་གསོག་ལ་བསྐུལ་འདིས་ཐམས་ཅད་སྒྲོལ། །སྦྱིན་པའི་ཕ་