[A:༨༡]གྱི་བྲག་ལོགས་ཤིག་ཏུ་རྣལ་འབྱོར་དབང་ཕྱུག་བིརྺ་པ་གཟིགས་པ་སྤྱན་འཁྲུལ་ལམ་དགོངས་ཏེ་ཞབས་འབྲིང་བ་རྣམས་ལ་ཁྱོད་ཚོས་མཐོང་ངམ་གསུངས་པ་ལ་གང་ཡང་མི་འདུག་ཞུས་སྐད། དེ་ནི་ལམ་འབྲས་བུ་དང་བཅས་པའི་གདམས་པ་ཡོངས་སུ་རྫོགས་པ་པདྨའི་སྐུད་པ་ལྟར་ཕྲ་བ་རྡོ་རྗེའི་རང་བཞིན་དུ་མཛད་དེ་བསྟན་པ་ཉིན་མོ་ལྟར་གསལ་བའི་རྟེན་འབྲེལ་དུ་མངོན། ཞ་ལུར་ཕེབས་ནས་དངུལ་དང་གོས་དར་སོགས་ཀྱི་ཚོང་བསྒྱུར་ལ་བརྟེན་འདུ་ཁང་ཆེན་མོར་གསེར་ཤོག་ཤིན་ཏུ་ཕྱུག་པའི་ཤིང་རྩི་ལེགས་པར་བསྐྲུན་ཏེ་རབ་གནས་རྒྱས་པར་མཛད་དོ། །མང་བཀུར་རྒྱལ་པོར་གསོལ་བའི་དགའ་སྟོན་ཞར། །མི་དབང་བཀའ་རྟགས་ལུང་གི་ལྕིད་ཆེན་པོས། །གསེར་བཀང་དྭངས་མཚོར་ཁྲིམས་ལྡན་ངུར་པའི་ཁྱུ། །ཐོས་བསམ་སྐད་སྙན་ཁྲོལ་བའི་ཆོ་ག་བསྟར། །རྡོར་འཛིན་དྲིན་ཅན་བླ་མ་རྣམ་གཉིས་ཀྱིས། །ཐུགས་དགོངས་ཆོས་དབྱིངས་ཀློང་དུ་ཉེར་རྫོགས་པར། །གཅིག་ཏུ་བརྩོན་འདི་བཤེས་གཉེན་བསྟེན་ཚུལ་ལ། །རྟག་ཏུ་ངུ་ཡི་རྣམ་པར་ཐར་པ་བཞིན། །གསར་པའི་ལེགས་བཤད་དངོས་གྲུབ་འདོད་འཇོའི་གཏེར། །ནཱ་རོ་ཏ་པའི་སྙན་བརྒྱུད་གསང་ལམ་མཆོག །མགོན་ཁྱོད་ཞལ་ལུང་རོ་བདའ་བདུད་རྩིའི་བཅུད། །ངོམས་མེད་འཐུང་བའི་ཐོག་མའི་སྐལ་བཟང་རྙེད། །ཁམས་འདུས་འཕྲང་གི་དབང་དུ་མ་གཏོང་ཞེས། །ཁྱབ་བདག་བླ་མས་མནལ་ལམ་ལུང་བསྟན་མཐུས། །དགྱེས་མཛད་རྡོ་རྗེ་ཡོངས་བསྙེན་གྲུབ་མཚན་གྱིས། །ས་དྲུག་མངོན་གྱུར་དཔལ་ལྡན་ཆོས་སྐྱོང་བཞིན། །བརྟུལ་ཞུགས་སྤྱོད་ལ་མཐར་ཕྱིན་ཐང་སྟོང་པས། །ལོག་འདྲེན་ཕྱེ་མར་འཐག་པའི་སྟང་སྟབས་མཛད། །