[A:༨༢]མཁའ་ལ་འདབ་ཆགས་ལྟར་འཕུར་སྤྲུལ་བསྒྱུར་གྱི། །འོད་གསལ་གཅིག་གིས་ཁོར་ཡུག་འབྱམས་སུ་ཀླས། །ཀུན་མཁྱེན་བུ་སྟོན་ཞབས་དེའི་སེང་གེའི་ཁྲིར། །མགོན་ཁྱོད་རྒྱལ་ཚབ་དམ་པར་དབང་བསྐུར་བས། །ཆེར་སྙིགས་བསྟན་པའི་མེ་ཏོག་ལྡུམ་ར་ལ། །རྣམ་གསུམ་འཁོར་ལོའི་ཆུ་བོ་འདྲེན་པར་བསྐུལ། །འཁོན་རིགས་འཇམ་དཔལ་དཔའ་བོས་རྗེས་སུ་བཟུང༌། །རྣལ་འབྱོར་དབང་ཕྱུག་དགྱེས་ཞལ་མངོན་སུམ་བསྟན། །རྡོ་རྗེའི་ཆོས་སྲུང་རྣམས་ཀྱིས་འཕྲིན་ལས་ཀུན། །འབད་མེད་སྒྲུབ་པའི་རྟེན་འབྱུང་ལྷུག་པར་འགྲིག །ཀུན་དགའ་རྭ་བའི་ཁོ་ར་ཁོར་ཡུག་རྣམས། །གསེར་གྱི་བ་གམ་ལྟ་བུའི་འོད་ཟེར་འཕྲོ། །དམ་ཚིག་ཡེ་ཤེས་གཉིས་མེད་རབ་གནས་པའི། །དགའ་སྟོན་དཔྱིད་ཀྱི་ཕོ་ཉའི་གླུ་བཞིན་སྙན། །ཤིང་སྦྲུལ་གྱི་སྟོན་རྗེ་ཉིད་པོ་ཏ་ལར་ཕེབས་ཧོར་ཟླ་བཅུ་པའི་ཚེས་དྲུག་ནས་ཞག་ཤས་ཀྱི་བར་ཀླུ་སྒྲུབ་རྗེས་མཛད་པའི་ལམ་འབྲས་ཀྱི་འཁྲིད། ཛམ་ལྷ་འབྲུག་གཞོན་མའི་རྗེས་གནང་སྒྲུབ་སྐོར། ཇོ་བོ་ཨ་ཏི་ཤ་ལུགས་ཀྱི་རྟ་མགྲིན་གཤོག་པ་ཅན་དང་ཤྭ་ན་བཞི་སྐོར་གྱི་རྗེས་གནང༌། བསམ་གཏན་གླིང་པའི་ཨ་ཏི། རྣམ་སྲས་ཀྱི་བེའུ་བུམ། བུ་སྟོན་རིན་པོ་ཆེས་མཛད་པའི་ལས་ཆོག་གི་ལུང་སོགས་གསུང་ཆོས་མང་དུ་ནོས་རྟེན་འབྲེལ་གྱི་ཁྱད་ནས་འཕྲང་འགོ་གཏེར་སྟོན་གྱི་ཚེ་རྟ་ཕུལ་ཞིང་བྱད་རྦོད་ཀྱི་ཐུགས་རྟོག་དང་བཅས་སྐུ་ཧ་ཅང་བདེ་བ་མི་འདུག་པས་བྱད་འགྲོལ་ཞུས། དགུན་གྲང་རིང་གོང་དཀར་ཆོས་སྡེར་སྐུ་མཚམས་ལ་ཕེབས་པའི་གསོལ་ཆས་ཕུལ། སྐུ་མཚམས་མ་ཚུགས་གོང་དུ་སློབ་དཔོན་རྣམ་མཁྱེན་གྲོང་པ་སོགས་ཆོས་སྡེའི་གྲྭ་སློབ་ཁ་ཤས་དང་གནས་གསར་འཇམ་དབྱངས་བསྟན་འཛིན་