[A:81]gyi brag logs shig tu rnal 'byor dbang phyug birWa pa gzigs pa spyan 'khrul lam dgongs te zhabs 'bring ba rnams la khyod tshos mthong ngam gsungs pa la gang yang mi 'dug zhus skad/ de ni lam 'bras bu dang bcas pa'i gdams pa yongs su rdzogs pa padma'i skud pa ltar phra ba rdo rje'i rang bzhin du mdzad de bstan pa nyin mo ltar gsal ba'i rten 'brel du mngon/ zha lur phebs nas dngul dang gos dar sogs kyi tshong bsgyur la brten 'du khang chen mor gser shog shin tu phyug pa'i shing rtsi legs par bskrun te rab gnas rgyas par mdzad do/ /mang bkur rgyal por gsol ba'i dga' ston zhar/ /mi dbang bka' rtags lung gi lcid chen pos/ /gser bkang dwangs mtshor khrims ldan ngur pa'i khyu/ /thos bsam skad snyan khrol ba'i cho ga bstar/ /rdor 'dzin drin can bla ma rnam gnyis kyis/ /thugs dgongs chos dbyings klong du nyer rdzogs par/ /gcig tu brtson 'di bshes gnyen bsten tshul la/ /rtag tu ngu yi rnam par thar pa bzhin/ /gsar pa'i legs bshad dngos grub 'dod 'jo'i gter/ /nA ro ta pa'i snyan brgyud gsang lam mchog /mgon khyod zhal lung ro bda' bdud rtsi'i bcud/ /ngoms med 'thung ba'i thog ma'i skal bzang rnyed/ /khams 'dus 'phrang gi dbang du ma gtong zhes/ /khyab bdag bla mas mnal lam lung bstan mthus/ /dgyes mdzad rdo rje yongs bsnyen grub mtshan gyis/ /sa drug mngon gyur dpal ldan chos skyong bzhin/ /brtul zhugs spyod la mthar phyin thang stong pas/ /log 'dren phye mar 'thag pa'i stang stabs mdzad/ /