[A:༨༣]ལ་བུ་སྟོན་ཆོས་འབྱུང་དང་བསམ་གཏན་གླིང་པའི་ཨ་ཏིའི་ལུང་གནང༌། མདོ་པ་ཆོས་རྗེ་མཚུངས་མེད་དགེ་བའི་དབང་པོར་འཇིགས་བྱེད་རོ་ལངས་བརྒྱད་སྐོར་གྱི་དབང་དང་རས་ཆེན་དཔལ་འབྱོར་བཟང་པོ་ནས་བརྒྱུད་པའི་ཚེ་དབང་མདའ་འཕེལ་མ་གསན། མེ་རྟ་ཆོ་འཕྲུལ་ཆེན་མོའི་ཐོག་དམར་པོ་རིར་ཕེབས་ཀྱེ་རྡོ་རྗེ་མན་ངག་ལུགས་ཀྱི་རྒྱུ་མལ་གྱི་དབང༌། ལམ་ཟབ་བིར་སྲུང༌། ནཱ་རོ་མཁའ་སྤྱོད། སྔར་མ་བྱུང་བའི་གུར་ཞལ་གྱི་བེའུ་བུམ་ཁ་སྐོང་གི་ཡིག་ཆ་དུ་མ། དག་ལྗོན་སྐོར་གསུམ། ཐུབ་པ་དགོངས་གསལ། བུ་སྟོན་ཆོས་འབྱུང༌། ལམ་འབྲས་པོད་དམར་དང་པོད་ཁྲའི་སྟོད་ཆ། སྨན་བླའི་མདོ་ཆོག །མཁན་ངག་དབང་ཆོས་གྲགས་ཀྱི་རྣམ་སྲས་ལྔ་ཕྲག་ལྔའི་རྗེས་གནང་གི་ཡི་གེ་མ་ཏི་ལུགས་ཀྱི་འཇམ་དཀར། སྣ་ཚོགས་ཡུམ། ལས་གཤིན་དཔའ་གཅིག །བཅུ་བདུན་མ། བསེ་བྱ་བཞིས་བསྐོར། ཁྲག་མདོག་དམར་པོ། ཏྲག་ཤད། གདུགས་དཀར། ལེགས་ལྡན་མཆེད་ཀྱི་རྗེས་གནང་སོགས་དབང་ལུང་ཟབ་ཆོས་མང་པོ། མན་ངག་དབང་རྗེས་གནང་གི་ཕྱག་ལེན་དང་གཞུང་དོན་གྱི་རིགས་ལ་ཐེ་ཚོམ་པ་དུ་མར་དོགས་གཅོད་ཞུས་པས། མདོ་ལས། གང་ཞིག་ཟས་དང་གོས་ཀྱི་གཏམ་ཙམ་ནི། །དེ་ནི་རབ་དང་མཆོག་ཅེས་སེམས་མ་ཡིན། །མི་ཡི་རྙེད་པ་རབ་མཆོག་རྙེད་ནས་ནི། །གཅིག་ལ་གཅིག་གིས་ཆོས་ཀྱི་གཏམ་ཡང་བྱ། །ཞེས་ཟས་གོས་སོགས་གནས་སྐབས་ཀྱི་འདུ་འཛིའི་གླེང་མོ་ནི་སྐྱེ་བོ་ཕལ་བ་དག་གི་ངང་ཚུལ་ཡིན་ལ། རྙེད་པ་མཆོག་ནི་དམ་པའི་ཆོས་ཀྱི་ལེགས་བཤད་ཡིན་པར་གསུངས་ཤིང༌། མགོན་པོ་ཀླུ་སྒྲུབ་ཀྱིས། སྨྲ་ན་ཡིད་ཕེབས་འབྲེལ་བ་དང༌། །དོན་