[A:༨༤]གསལ་ཡིད་དུ་འོང་བ་དང༌། །ཆགས་སྡང་ཞེ་སྡང་སྤང་བ་དང༌། །འཇམ་ཤིང་རན་པར་སྨྲ་བར་བྱ། །ཞེས་བརྗོད་བྱའི་དོན་ཁུངས་དང་འབྲེལ་ཞིང་ཚིག་དོན་རྣམས་མ་འདྲེས་པར་སོ་སོར་གསལ་ལ་སྙན་པར་སྨྲ་བས་ཡིད་ལ་འཇེབས་པ། རང་ཕྱོགས་ལ་ཆགས་པ་དང་གཞན་ཕྱོགས་ལ་སྡང་བ་མེད་པ་གཟུ་བོའི་ཚིག་གིས་གདུལ་བྱའི་བློ་མཆོག་དམན་དང་བསྟུན་ཏེ་རན་པར་སྨྲ་བའི་ཡོན་ཏན་མཐའ་དག་བླ་མ་དམ་པ་འདི་ཉིད་ལ་ཚང་བས་རྒྱལ་བའི་གསུང་རབ་སྤྱི་དང་ཁྱད་པར་རྡོ་རྗེ་ཐེག་པ་ལ་མཁས་པའི་ཡང་རྩེར་སོན། སོ་སོར་ཐར་པའི་བཅས་པ་ཕྲ་མོ་ལའང་མི་འདའ་བའི་བཙུན་པའི་མཆོག་ཏུ་གྱུར། བདག་གཞན་མཉམ་པར་བརྗེ་བའི་བྱང་ཆུབ་ཀྱི་སེམས་བཅོས་མ་མ་ཡིན་པ་ཐུགས་རྒྱུད་ལ་མངའ་བས་བཟང་པོའི་ཚད་དུ་ཕྱིན། བསྐྱེད་པ་དང་རྫོགས་པའི་རྡོ་རྗེ་རྣལ་འབྱོར་མཆོག་ལ་བརྟེན་ནས་རྟོགས་པའི་བདག་ཉིད་ཆེན་པོར་གྱུར། ཁྱད་པར་ཀུན་མཁྱེན་བུ་དང་རྡོ་རྗེ་འཆང་ཚར་པ་ཆོས་རྗེའི་རིང་ལུགས་ཐུགས་ཀྱི་དཔལ་བེའུར་བཅངས་པའི་བསྟན་འཛིན་སྐྱེས་བུ་ཟླ་མེད་པར་མཐོང་ནས་གཅམ་བུ་ཙམ་མ་ཡིན་པར་ཁྱབ་བདག་རྡོ་རྗེ་སེམས་དཔའི་ངོ་བོར་ཡིད་ཆེས་ཀྱིས་མོས་པ་ཐོབ། སེ་སྟོན་ཆེན་པོའི་དབང་ཆོག་ངེས་དོན་བདེ་འཇུག་གི་སྟེང་ནས་འཇམ་དཔལ་གཤིན་རྗེ་གཤེད་ཕྱག་རྒྱ་ཟིལ་གནོན་གྱི་དབང་བཞི་ཡོངས་རྫོགས་དང་བྱང་འགྲོ་ལ་ཕུལ། སྐྱི་གཙང་གི་ཆུ་བཟང་ལས་སྐུ་ཁམས་ཀྱང་ཤིན་ཏུ་དྭངས། ནཱ་རོ་མཁའ་སྤྱོད་དང་འཆི་མེད་དཔལ་སྟེར་གཉིས་ཀྱི་བརྒྱུད་འདེབས། གཤེད་དམར་གྱི་བརྒྱུད་འདེབས་ཐུགས་སྲས་ལོ་ཙཱ་བས་མཛད་པའི་འཕྲོ་འཐུད་རྣམས་བཞེད་པ་བཞིན་བརྩམས། ཆོས་