[A:༨༨]ཁ་སོགས་སྨན་དཔྱད་ཀྱི་འཕྲོད་བསྟེན་མང་དུ་ཞུས་པས་སྐྱེད་བླངས། སྐུ་གེགས་ལ་དམིགས་པའི་སྲུང་འཁོར་བཞེས་ཡིག །བདེན་པ་བརྗོད་པའི་ཚིགས་བཅད་ཚན་གྲངས་དང་བཅས་འབུལ་མི་མངགས། དལ་འགྲོས་ཀྱིས་པོ་ཏ་ལར་ས་བྱའི་མཇུག་ཏུ་ཕེབས། ངེད་ལག་པ་ན་བ་དང་ཐུག་པའི་རྗེས་གནང་འབུལ་མ་ཐུབ་རུང་དེ་བཞིན་གཤེགས་པའི་འཕེལ་གདུང་དང་ཨྱོན་ཆེན་པོའི་གཏེར་སྐུ་མང་པོའི་བྱིན་རླབས་ཕུལ། སྐུ་ཁམས་དུབ་པར་འདུག་པས་ཆོས་ཞུ་བའི་སྤྲོས་པ་མ་བྱུང༌། གསོལ་ཕོགས་དང་བཅས་སྐུའི་འཕྲོད་བསྟེན་ལ་གོང་དཀར་ཆོས་སྡེར་བཞུགས། ལྕགས་ཁྱི་ཟླ་བ་གཉིས་པའི་ཚེས་འགོ་ལ་ཡར་བྱོན་ལོག་ཏྲིའི་རིག་གཏད་ཕུལ་བས་རྒྱ་མཐོངས་ཁ་ཕྱེ་བ་ལྟ་བུའི་སྙུན་གཞི་ལ་ཁྱད་མངའ་ཆེ་བ་བྱུང་གསུང༌། ཀུན་མཁྱེན་བུ་དང་བྱང་སེམས་བསོད་གྲགས་པ་ཞལ་སྤྲོད་ཀྱི་བྲིས་ཐང་བྱིན་ཅན་ཞིག་གནང༌། ཞལ་འདོན་ཚིགས་བཅད་མ་དགོས་ཕེབས་པ་ངེད་རང་ལ་ནུས་མཐུ་གང་ཡང་མེད་མོད་འོན་ཀྱང་འབྲོག་མིའི་གསུང་བགྲོས་རྡོ་རིང་རིན་པོ་ཆེའི་རྣམ་ཐར་དུ་དྲངས་འདུག་པ་བཞིན། ཚེ་མཐའ་ཡས་དངོས་དབང་དྲག་པདྨ་ཡི། །འཁོར་ལོའི་མགོན་པོ་ངག་དབང་བློ་གྲོས་གཏེར། །སྐལ་བཟང་རྒྱ་མཚོར་ངེས་པས་གསོལ་འདེབས་ན། །བར་ཆད་བདུད་ལས་རྒྱལ་བར་བདག་བྱིན་རློབས། །ཞེས་པ་བྲིས་ནས་ཕུལ། མཚན་སྒྱུར་གནང་རྒྱུ་ཡིན་ཕེབས་པར་ཚེ་དབང་ལྷུན་གྲུབ་རབ་བརྟན་བསྟན་པའི་རྒྱལ་མཚན་དཔལ་བཟང་པོར་གསོལ། འཕྲེང་བ་ཞེ་ལྔ་མའི་དཀྱིལ་ཐང་བཞེང་པའི་འགོ་ཚུགས་དང་འགྲིག་པའི་རྒྱ་བོད་ཀྱི་གཞུང་དང་རྡོ་རྗེ་གདན་པའི་ཐུགས་དམ་ཐང་ཁ་བསྟུན་པའི་ཞུ་དག་གནང༌། གཙང་