[A:༩༨]གཞན་དང་མི་འདྲ་བའི་གསན་རྒྱ་འདུག་ནའང་གསུང་ངག་སློབ་བཤད་ཀྱི་འཁྲིད་ལུང་ཙམ་ལས་མ་བྱུང་འདུག་པ་བསྟན་རྒྱུན་ལ་དགོངས་ནས་གསན་དགོས་པའི་སྙན་འབུལ་ཕུལ་བ་བླ་ཆེན་སྤྱི་རིགས་ཀྱི་བཟང་བརྫུ་འུག་པ་སྤོས་པ་ལྟ་བུའི་སྟོང་ལྡིང་མི་གནང་བར་དགོངས་པར་བསྟད་སོང་བ་བཞིན་དཔོན་སློབ་གཉིས་ལ་ལེགས་སོའི་ཞུ་མཆིད་དང་མགོན་ཁང་ཚོར་འཕྲིན་བཅོལ་གྱི་སྙན་དར་སོགས་སྐད་གཉིས་སྨྲ་བར་ཕུལ་བ། བཀའ་ལས། དབོན་པོ་ལོ་ཙཱ་བ་ལ་ཐུགས་དམ་བཀའ་ཤོག་རིན་པོ་ཆེ་བྱི་བ་ལ་གླང་ཆེན་སྦྲང་བུ་ལ་མཁའ་ལྡིང༌། ཕྱུག་པའི་བུ་ལ་རྣམ་ཐོས་སྲས་སུ་བསྔགས་པ་ལྟ་བུའི་གསུང་རྡོ་རྗེའི་ཚིག་གནང་སྦྱིན་གྱ་ནོམ་པ་དང་བཅས་སྤྱི་བོར་ཕེབས་པ་དང་ལྷན་དུ་གདན་ས་ཆེན་པོ་དཔལ་ལྡན་ས་སྐྱའི་མགོན་ཁང་སོ་སོར་སྙན་དར་འཕྲིན་བཅོལ། རིགས་ལྡན་འཇམ་པའི་རྡོ་རྗེ་གོང་བཞུགས་རིན་པོ་ཆེར་ཡང་བསྔགས་བརྗོད་གནང་ཆ་དང་བཅས་ཕེབས་པ་བཞིན་ཟླ་བ་དྲུག་པའི་ཚེས་བཅུ་གཅིག་ལ་ཤབ་ལ་ཕྱིན་ཞེས་གསུང་བ་ལྟར་གདན་ས་པར་དགེ་སྡིངས་བཀྲ་ཤིས་བསམ་གྲུབ་ཏུ་འཇམ་མགོན་ས་སྐྱ་པ་ཆེན་པོའི་ཞབས་ཕྱིར་གནས་གསར་ཞབས་དྲུང་དབོན་སོགས་དོན་གཉེར་ཅན་དུ་མ་ལ་གསུང་ངག་རིན་པོ་ཆེ་སློབ་བཤད་བཙུགས་པ་སྣང་གསུམ་གྲོལ་མཚམས་བདག་ཆེན་རིན་པོ་ཆེ་ཕུར་སྒྲུབ་ལ་ཆིབས་ཁ་སྒྱུར། རྗེ་ཉིད་ལྗགས་བསྙེན་ཁ་གསོའི་སྐབས་བདུད་རིགས་ཀྱི་འཚུབ་ལྷོངས་ཀྱིས་སྐུ་ལྟེམ་བབས་ཤིན་ཏུ་ལྕི་བ་བྱུང་བའི་ཚེ་ནུབ་ཀྱི་མནལ་ལམ་དུ་བུད་མེད་ལུས་ཐོག་ཚད་གང་ཙམ་པ་གཙང་མོའི་གོས་རྒྱན་ལམ་ཙམ་བྱས་པ་བརྗིད་ཆགས་པ་དེའི་གཡས་ན་དབོན་ས་རྒྱལ་མཚན་པ། དཔོན་ས་ཚེ་བརྟན་པ། བུད་མེད་གཞན་ཅིག་དང་