[A:31]brtan tshar chen chos kyi rgyal po'i gdan sar phebs pa'i legs 'bul la byon/ rje bla ma'i sku rim la sgrol dkar yid bzhin 'khor lo'i sbyin sreg gang mang dang / gtsug tor 'bar ma'i chu bzlog mdzad/ dge slong chen po mkhas grub par thams cad mkhyen pas mdzad pa'i 'od zer dri med kyi srog shing 'dzugs pa'i cho ga'i lung gsan/ phyir phebs nas rdo rje 'chang la lo 'di tsam bzhugs kyi zhal bzhes dgos pa'i zhu yig 'bul ba gnang ba'i lan du khyed kyi ngor lo lnga sdod pa'i mnyam gzhag brtan po byed gsung ba'i zhal lan 'byor/ rin lding gi slob dpon sde srid du nan bskyed kyis khrol cha zhus nas rtsis sprod sogs kyi thugs brel dang 'grig pa'i 'dar du gsung ngag rin po che gsan par 'phros byung yang phebs ma thub/ de nas lo lnga tsam gyi bar ri phug tu bcar bzhugs ngos chos brgyad kyi bun long mtha' dag rgyab tu bskyur nas nyin mtshan ngo mi mkhyen pa lta bu'i brtson pas bgrang yas rgyud sde rgya mtsho'i pha rol tu son pa'i thugs gnyer smar bar mdzad/ skabs shig 'dar du rwa 'khrid mkha' 'gro snyan brgyud tshugs par brda byung rung zha lu'i gra rgan 'dres bslab gnyer la gnod ces phebs ma bcug pas thugs 'phreng yang gnang thebs dang bral/ nub cig mnal lam du sngar brag rdzong ma'i ljags bsnyen dus byung ba'i hwa shang de yin rgyu'i khul zhig gis gzims khang steng gi rgyal mtshan dar lcog sogs rgyan du ma 'dug pa rnams bcag song ba zhig byung ba sang nang par ldum rar byon pas byang chub shing gi sdong po de yang dngos