[A:93]rnam sprul chos rgyal rab brtan kun bzang 'phags kyi dgongs pa bzhin dpal 'khor chos sde'i sa ga zla bar dge rtsa chen mor grags pa'i dkyil 'khor bzhi bcu zhe lnga'i sgrub mchod yod pa'ang phyis skor dbang ma thob par byung rgyal du spyad pa'i yang ba zhig yod snang bas/ 'di lo khyab bdag zha lu pa chen pos nged la khyab cha dgos tshul dang gter ston rin po cher yang de ka'i bskul ma dgos pa'i phebs sgo bzhin mkhan po dang rdzong sdod la yig rgya zhib 'thems byas pa ltar bu lugs pa rnams kyi dbang mkhan chen kun spangs pa chen po dang / zha lu'i chen slob chos 'chad gsum bcas pas gtsug dgu dang 'od zer can ma ma gtogs sambuTi dang gsang 'dus 'jig rten dbang phyug dor ba'i lhag sa lugs dbang bka' rnams 'jam mgon sa skya pa chen pos gsos/ sa skya nas ma gsan gshis sgrol ma bcu bdun ma gur par rje nyid kyis gnang / zha lu pa tshor klu sgrub lugs kyi spyan ras gzigs chos rje bco brgyad pa dang / rdo rje gdan bzhi rab 'byams chos rje rin chen rgya mtshos mdzad pas/ phyag chen thig ler/ dbang med na ni dngos grub med/ /bye ma btsir la mar med bzhin/ /gang zhig rgyud lung nga rgyal gyis/ /dbang bskur med par 'chad byed pa/ /slob dpon slob ma shi ma thag /dngos grub thob kyang dmyal bar skye/ /zhes pa'i 'jigs pa las grol zhing deng sang bstan pa rma med du gsos pa'ang khyab bdag zha lu pa chen po'i bka' drin no/ /slar sa skyar phebs chos bka' phar 'bul