[A:༩༣]རྣམ་སྤྲུལ་ཆོས་རྒྱལ་རབ་བརྟན་ཀུན་བཟང་འཕགས་ཀྱི་དགོངས་པ་བཞིན་དཔལ་འཁོར་ཆོས་སྡེའི་ས་ག་ཟླ་བར་དགེ་རྩ་ཆེན་མོར་གྲགས་པའི་དཀྱིལ་འཁོར་བཞི་བཅུ་ཞེ་ལྔའི་སྒྲུབ་མཆོད་ཡོད་པའང་ཕྱིས་སྐོར་དབང་མ་ཐོབ་པར་བྱུང་རྒྱལ་དུ་སྤྱད་པའི་ཡང་བ་ཞིག་ཡོད་སྣང་བས། འདི་ལོ་ཁྱབ་བདག་ཞ་ལུ་པ་ཆེན་པོས་ངེད་ལ་ཁྱབ་ཆ་དགོས་ཚུལ་དང་གཏེར་སྟོན་རིན་པོ་ཆེར་ཡང་དེ་ཀའི་བསྐུལ་མ་དགོས་པའི་ཕེབས་སྒོ་བཞིན་མཁན་པོ་དང་རྫོང་སྡོད་ལ་ཡིག་རྒྱ་ཞིབ་འཐེམས་བྱས་པ་ལྟར་བུ་ལུགས་པ་རྣམས་ཀྱི་དབང་མཁན་ཆེན་ཀུན་སྤངས་པ་ཆེན་པོ་དང༌། ཞ་ལུའི་ཆེན་སློབ་ཆོས་འཆད་གསུམ་བཅས་པས་གཙུག་དགུ་དང་འོད་ཟེར་ཅན་མ་མ་གཏོགས་སམྦུཊི་དང་གསང་འདུས་འཇིག་རྟེན་དབང་ཕྱུག་དོར་བའི་ལྷག་ས་ལུགས་དབང་བཀའ་རྣམས་འཇམ་མགོན་ས་སྐྱ་པ་ཆེན་པོས་གསོས། ས་སྐྱ་ནས་མ་གསན་གཤིས་སྒྲོལ་མ་བཅུ་བདུན་མ་གུར་པར་རྗེ་ཉིད་ཀྱིས་གནང༌། ཞ་ལུ་པ་ཚོར་ཀླུ་སྒྲུབ་ལུགས་ཀྱི་སྤྱན་རས་གཟིགས་ཆོས་རྗེ་བཅོ་བརྒྱད་པ་དང༌། རྡོ་རྗེ་གདན་བཞི་རབ་འབྱམས་ཆོས་རྗེ་རིན་ཆེན་རྒྱ་མཚོས་མཛད་པས། ཕྱག་ཆེན་ཐིག་ལེར། དབང་མེད་ན་ནི་དངོས་གྲུབ་མེད། །བྱེ་མ་བཙིར་ལ་མར་མེད་བཞིན། །གང་ཞིག་རྒྱུད་ལུང་ང་རྒྱལ་གྱིས། །དབང་བསྐུར་མེད་པར་འཆད་བྱེད་པ། །སློབ་དཔོན་སློབ་མ་ཤི་མ་ཐག །དངོས་གྲུབ་ཐོབ་ཀྱང་དམྱལ་བར་སྐྱེ། །ཞེས་པའི་འཇིགས་པ་ལས་གྲོལ་ཞིང་དེང་སང་བསྟན་པ་རྨ་མེད་དུ་གསོས་པའང་ཁྱབ་བདག་ཞ་ལུ་པ་ཆེན་པོའི་བཀའ་དྲིན་ནོ། །སླར་ས་སྐྱར་ཕེབས་ཆོས་བཀའ་ཕར་འབུལ་