[A:126]thun brdeg cing / drag sngags dang rol mo'i sgra bsgrags pa tsam gyis 'byung po gzhan du yul 'bud nus pa/ sku gsung thugs rten la rab gnas mdzad pa'i tshe phyag nas dngos su chags pa sogs ya mtshan gyi rtags du ma dang ldan pa'i sku zhang 'jam dbyangs dbang po dang / yum khri dpon phod mdo ba'i blon po'i rigs dpal stag lung pa chen po'i phyag mdzod kyi brgyud pa dpon chen phreng stag pa'i sras mo/ /dkon mchog la gus shing yid gzhung pa gu ru sgrol ma gnyis kyi khye'ur gyur pa zhig yin 'dug cing / de'ang gang las 'phos kyang skye ba zhig yin pa las 'os ma 'das kyang / gsung rgyun sogs las/ khu bo chos kyi spyan ldan gyi dbu bla/ tshar chen chos kyi rgyal po yab sras kyi dngos slob/ /sngags 'chang sangs rgyas rin chen gzims khang gong du sgrub pa la bzhugs pa'i dus shig /yab rje 'jam dbyangs dbang po nyid kyi byon pas stan las bzhengs te spyan hur gyis gzigs nas/ mdang rmi lam du bud med smug mo zhig byung nas/ khyod dag pa mkha' spyod du 'gro'am/ bco brgyad kyi dbon brgyud byed dre ba byung bas/ de ring khyod 'dir byon pa 'di rten 'brel legs byung gsung dges dges du ma mdzad cing zhi bar gshegs nas ring por ma lon par yum la khye'u yod pa'i rtags mtshan du gyur/ khog tu yod pa'i tshe zhang po lags kyis/ gong ma chos kyi spyan ldan la brtag pa zhus par/ da lan brtag pa yang shin tu legs po byung / bstan pa la phan pa zhig 'ong / bar chad mi 'byung bar 'dug lung bstan gnang zhing / yum la bka' dbang srung 'khor sogs brtse bas bskyangs/