[A:325]bka' drin bskyangs/ chu de gzugs bzhir shin tu gnod par 'dug kyang / chos bdag por phul grub pas sems kha rdzogs pa zhig byung zhing / na so'i stabs yang yang slebs ma thub gshis nan bskyed kyis zla ba bzhi'i ring phar phul tshur zhu sogs dam pa'i chos kyi 'khor lo bla na med pa bskor ro/ /rgyal kun mkhyen brtse'i ye shes gur khyim nas/ /bsil ldan 'gro la rjes chags 'jam mgon gyi/ /snang brnyan sku'i bkod zlos gar rim bsgyur ba'i/ /ya mtshan zhing mchog dam pa'i gdan sa cher/ /nges pa don ldan 'jam mgon gong ma'i drung / /bskal bzang dge sbyor ngur smrig gos can kyang / /sngon bsags las dbang ldan pa'i legs byas kyis/ /gsung gis 'tsho ba'i dga' ston gnas skabs 'dir/ /legs par bsams na deng nas byang chub bar/ /mi 'bral thugs rje'i spyan gyis gzigs sam snyam/ /snyan brgyud ma dros tshangs pa'i ral klung las/ /bdag 'dra'i thos chung zil dngar phra mos kyang / /dam pa'i thugs bskyed ye shes bum bzang gi /cha shas yongs su khengs 'di ngo mtshar gnas/ /ji snyed gsung gi gsang ba dbyar skyes sgra/ /bdag cag mdongs mtha'i sgra 'dzin la 'gyed na/ /bla gos sgro gshog 'phrul gyis dga' ba'i gar/ /ci nas mi sgyur snyom las dal ba su/ /a ho 'di 'dra'i skal bzang rab snyan glu/ /ji bzhin rdzogs par blangs na dbyangs can gyi/ /rgyud stong phang 'gro'i sgra dang dri za'i glu/ /snyan par sems pa phal cher rdzun du thal/ /de nas dgon gnas dang gzhi nas myur du 'ong dgos tshul gyi yi ge byung ba dang / lhag tu gong sa chen po nas mgyogs tsam 'ongs na 'gab pa'i bka' shog rin po che