[A:324]thub bstan mkhan chen nas thams cad mkhyen pa dkon mchog lhun grub kyi bka' 'bum dang / grub pa'i dbang phyug rje drung rin po che nas lam sbas bshad kyi khrid gong nas gsan pa'i zhor la zhus/ lha khang chen mo'i rten rnams dang / sgrol ma sems dpa' sum brtsegs kyang zhib par mjal/ 'di phyi'i don du smon lam yang dag btab/ bstan srung rgya mtsho'i bzhugs gnas kha'u brag rdzong mjal bar phyin/ spyan gzigs dang snyan dar phul/ bskang ba rgyas par byas skabs sgra chen po zhig dang lhan du/ dpal mgon nyid bram gzugs sku mdog mthing nag ral pa'i thor gtsug can/ rgyan phyag mtshan sogs zhal bzhi yongs rdzogs ltar/ drag shul mi bzad pa dang ldan pa zhig zhal mngon sum du bstan pa'i tshe/ sems thog mar 'jigs zhum pa dang / de nas bde ba dang ldan pa zhig byung / grub dbang du mas byin rlabs kha'ur slebs/ /bdud dpung tshar gcod bstan srung dbang po yi/ /sku nyid mngon sum mthong zhing byin brlabs tshe/ /rgyal bstan srung ba'i bka' bsgo phrin bcol byas/ /gzhan yang gnas der bzhugs pa'i rten rnams zhib par mjal/ snyan shal/ spos/ mar me/ zhal zas sogs rgyas par phul zhing / smon lam yang dag btab/ nyin skor gyis phyir 'byor/ sngags 'chang bla ma nyid zhabs pad yun ring du brtan pa'i phyir nged rang dpon slob rnams kyis bcom ldan 'das tshe sbyin yid bzhin 'khor lo'i cho ga dang 'brel ba'i 'chi bslu dang zhabs brtan rgyas pa zhig phul zhing / ya gir sdod ring phog /zur chas/ nyin kha shas re nas ston mo shin tu rgyas pa sogs lugs gnyis ka nas thugs nang gtsang zhing / gang ci thams cad du gzhan dang mi 'dra bar