[A:133]nas sems can du ma sdug bsngal gyis gzer ba rmis pas gnyid sad pa na 'jigs shing / zhag bcu skor gyi ring yid mi bde bas mchi ma 'khrugs pa dang nges 'byung gi snang ba skyes/ rgyu dbang skabs su 'ja' li'i steng du gong ma nyid dgyes mdzad rdo rje he ru ka yab yum du mthong bas dga' bde dang dad gus kyi spu long g.yos shing / de nas bzung bla ma 'di rdzogs pa'i sangs rgyas dngos yin snyam pa las khu bo dang mi phal pa'i snang ba skad cig kyang mi 'char/ lam zab gnang skabs dpal ldan bla ma dam pa de nyid rje btsun sa skya pa chen po'i sku'i rnam pa bzhugs pa chos thun de ma rdzogs bar mthong zhing / 'di dag gi skabs nam mkha' la 'ja' dang / sum rtsen pa rnams kyis me tog gi char yang yang 'bebs par 'dug /nged sku mched dang / ra ba smad slob dpon pa sogs kha shas kyis gsol ba btab pa'i ngor lam zab dang / bir srung nang ma/ bla ma rin 'byung / tshar gsum khug pa/ sgrub pa lung sbyin/ brda chig brgyud/ lam sbas bshad/ brda don gsal ba/ rnam 'joms bir lugs/ mgon rkyang gi rjes gnang sogs thun mong ma yin pa rnams dang / pod nag ma'i lung bcas gnang / dpal ldan sa skya pa'i chos srung kun gyi gtso bo dpal rdo rje nag po chen po gur gyi mgon po lha lnga ma dang / brgyad ma/ bcu gnyis ma rnams kyi dbang dang / phyi nang gi khrid/ me 'bar ma dang snyan brgyud pu sti'i lung / pho rkyang / mo rkyang / sbags sgrub rnams kyi