[A:372]dud pa sprin phung ltar 'khrigs pa dang bcas zhabs drung rin po che dpon slob mang bas gdan drangs pa mgon khang du pheb 'phral zhal gro'i ston mo gsang sbug nas tshang dpon lags rnam dpyod 'jig rten gyi mes por 'gran bzod pas khur bzhes mdzad de rten 'brel rang 'grigs su gyur/ de nas bzung zhag bcu gcig gi ring nged khu dbon/ mtshungs med chos rje rin po che bcas gtsor gyur pa'i dgong bstar rab gnas tshar re dang / tshes bcu gcig gi nyin res gza' nyin mor byed pa dang rgyu skar me bzhi 'dzom pa'i 'grub sbyor bzang po'i thog dbu btsugs te/ zhag gsum gyi ring nged dpon slob bzhi bcu skor gyis mgon khang gi rab gnas nas bshad pa bzhin rab gnas shin tu rgyas par byas pa'i tshe/ nyin gnyis pa'i nyin dpal ldan 'dod khams gtso mo nyid kyi sku khru gang pa zhig thim pa'i snang ba shin tu gsal ba zhig byung zhing / nyin gsum par sbyin sreg bcas/ mdor na rab tu gnas pa cha lag tshang ma legs par grub pa'i tshe sku de sngar las gzi brjid che ba sogs ye shes sems dpa' mngon sum du thim pa'i rtags mtshan khyad par du 'phags par gyur to/ /e ma mchog gsum kun 'dus bla ma dang / /yi dam lha tshogs chos srung nor lha sogs/ /sras bcas rgyal ba'i thugs rje'i char rgyun gyis/ /mos gus ldan pa'i 'dod don yid bzhin 'grub/ /'jigs rung gang sku dpa' brjid rab ldan zhing / /'jigs bral gsung gis dam nyams klad 'gems pa/ /'jigs med bde chen thugs kyi klong dkyil nas/ /'jigs bral rig 'dzin rnams la dngos grub ster/ /de ltar ma gcig dpal ldan lha mo yi/ /sku brnyan