[A:373]gzi byin ldan par legs grub par/ /rab gnas byas tshe 'og min zhing khams sogs/ /rab 'byams rgyal ba'i gnas nas srid gsum bdag /'khor bcas sprin bzhin 'dus te thim pa'i tshe/ /sku nyid mngon sum 'phar ba kun gyis ni/ /mthong sogs ya mtshan du mas gang bar gyur/ /legs par grub nas sprul sku ba gnyis la yon sogs shin tu rgyas par bsgrubs/ tsha mo lha ldan lha khang pa'i gnas ma gshin stabs phyir log byas pa/ gza' tshes dge bar tshar chen chos kyi rgyal po dang gdung rus gcig pa/ sde pa lha gshongs pa'i sar rdzong bda' byas/ sde dge dbon po phyir 'byon lam du dpal mgon zhal gyi rjes gnang rnams gsan par pheb pa bstan pa la phan phyir/ zhabs drung dbon rin po che dang lhan du chos srung rnams kyi rjes gnang zur bka' zab pa las kyang ches zab pa rdo rje 'chang tshar chen chos kyi rgyal po yab sras kyi ring lugs drin chen rdo rje 'chang pha bla ma rin chen bsod nams mchog grub kyi bka' drin las nos pa rnams dang / gzhan yang dbang / rjes gnang / lung sogs ches mang ba zhig phul/ pheb rdzong la rdzogs pa'i sangs rgyas kyi gser sku shin tu legs pa zhig dang byin rten/ na bza'/ snam bu sogs shin tu rgyas par phul te spyi dang bye brag gi bstan pa la phan pa'i bslab bya dpyis phyin par byas shing / mdzod pa sogs pheb skyel du rdzong bda' byas/ gong sa chen po'i bka' shog gtan tshigs rin po che shin tu legs par yang zhus te bskur/ ston khri 'du nas 'bul dpon bla ma chos mdzad dpon slob 'khor bcas byon zhing gzhis len gzabs rgyas byas/ gser/ me mda'/ rta/ dre'u/