[A:444]tu gsal zhing / zil pa phrom phrom byed pa sogs sku dngos su sos pa lta bur gyur par/ der gnas kyi zhabs 'bring tshang ma gdong mchi mas gang zhing / dam pa'i ded dpon dang bral ba'i sems khral gyi zug rngu bzod blag med pa zhig tu gyur to/ /kyi hud rgyun chad med pa'i 'khor ba 'dir/ /yang yang sdug bsngal zug rngus nyer gtses las/ /skyabs pa'i 'dren mchog rta bdun rgyal po de/ /nub ri'i phag tu nub pa'i tshul bstan tshe/ /bdag sogs sems can mgon med su la re/ /bsam kyin nyin mtshan khor yug 'dren pa mchog /dran te bdag snying khol ba'i chu gter gyis/ /'dren byed bzhin ras yongs su khyab par gyur/ /de nas yid bzhin gyi nor bu lta bu'i sku gdung rin po che gzims chung sbug tu gdung sgrom gyi nang du bye ltems zhus te/ dbu'i thad du dbu rgyan thag drub shin tu legs pa zhig gsol/ sku'i thad du snam sbyar dang / sku mdun du phyag Da ma/ phyag dril sogs sku'i nyer spyad rnams bshams shing / dbu thog tu bla bre/ g.yas g.yon du phye 'phur/ 'phan gdugs sogs mchod rdzas kyi rnam pa du mas mdzes par brgyan/ spos/ mar me/ zhal zas sogs sna lnga'i mchod pa rgyun chad med par 'grub mkhos bgyis shing / de'ang dpal ldan bla ma'i tshogs la sku'i nyer spyad sogs 'bul ba 'di nyid rgyud mtha' dag gi dgongs pa dang mthun par mngon te/ ji skad du/ rdo rje gur las/ mgo bor dbu rgyan bskon bya zhing / /lag par rdo rje dril bu byin/ /zhes dang / gsang 'dus las/ slob dpon lha ni dam pa ste/ /'bad pa'i sgo nas mchod par 'os/ /zhes dang / dpal mgon 'phags pa klu sgrub kyis mdzad pa'i