[A:410]du rnam sras sogs sgrig pa gnang bar/ phyi nyin gnyis kyi bar rigs kun khyab bdag dpal ldan bla ma mchog gi zhabs 'bring du grub pa'i dbang phyug rngog gdong chos rje sogs dpon slob ches mang bas bcom ldan 'das dgyes mdzad rdo rje'i sgo nas dngos grub 'byung ba nas ji ltar bshad pa bzhin rab tu gnas pa bka' drin bskyangs pa'i tshe/ 'og min gyi zhing nas ye shes sems dpa' rnams mngon sum spyan drangs te dam tshig sems dpa' rnams la bcug nas bstan dgra rnams 'joms te dngos grub 'bad med du stsol ba'i mnga' gsol bka' drin bskyangs/ sgom khang du bzhugs zhag bdun brgyad tsam bka' drin bskyangs ring nyin bstar btsun ma rnams la rjes gnang gi rim pa dang / grol dbang du grub pa'i dbang phyug chen po thang stong rgyal pos mchog gi slob dpon chen po las dngos su gsan pa'i 'chi med dpal ster gyi tshe dbang byin rlabs can de bka' drin bskyangs shing / gtso bor grub dbang jo lags sku mched dang grwa rigs bcas nas dkar gro sogs rgyun par sger gzhung so sos gang 'byor yang dag zhus shing / khyad par zhabs brtan nyin tshe sbyin yid bzhin 'khor lo'i cho ga la brten pa'i zhabs pad yun du brtan dgos pa'i gsol 'debs sogs yang dag gnang thog /nas sran gtso bor gyur pa'i mkho rgu'i longs spyod la sogs rgyal po'i 'byor pa'i khengs pa 'phrog nus pa tsam du 'bul bar mdzad/ dad 'dun yon bdag rnams kyang 'byor babs dang bstun pa'i sha mar/ ja/ gos dar sogs kyi 'bul ba rgyas par phul zhing / phar yang byin rten gnang skyes sogs rgya che bar bka' drin bskyangs/