[A:486]'di 'dra mi 'ong zhes/ /'phya dmod 'thing slad byed pa 'ga' mthong mod/ /de dag rang gi de nyid ngom bzhin du/ /'jig rten pha rol gzigs mor gshegs te thal/ /de'ang rang gi skyon rnams sbed gang thub dang / yon tan rnams ngom gang thub byed pa blun rmongs kun gyi phyag len du gda' na'ang / bdag la ni yon tan ngom par 'dod kyang bsam mno btang na ngom rgyu 'ang mi 'dug /'on kyang grwa tshang du lo bcu gsum song kyang sgrig dang gang mthun las zhog pa gcig gi tshogs kyang gcog ma myong / grwa pa bgres pa lta ci/ tha na chab hril ba tshun la 'khrugs pa byed pa lta ci smos/ mig log tsam yang byed ma myong ba de dus kyi rgyus yod thams cad kyi thugs la mnga' ba de yin/ khyad par gsang phu'i grwa tshang gzhan rnams byams pa yod/ rang ngos la de 'dra bsam pa yod kyang mi tsho ga 'dra bsam yod ni ci shes/ gang ltar de yan chad thos bsam byas tshul phran bu gang yod sprug sprug gsig gsig byas nas bkod pa'i skabs so/ /de nas 'chad nyan gyi ming btags rang gi dpag tshod byas tshul 'god rin chog pa mi 'dug kyang / rje bla ma'i gsung rgyun nyams pa med pa lan skyel ba'i rim pa rnams bkod na/ rang lo so brgyad la rang gnas rmor gyi dben gnas su gcad rgya shin tu dam pa'i sgo nas bcom ldan 'das kye rdo rje'i gzhi'i bsnyen pa zla ba brgyad kyi bar 'jam dbyangs mkhyen brtses mdzad pa'i bsnyen yig sor bzhag gi zhar la yum gyi gzhi bsnyen dang bcas rung ba dang / mjug tu kha skong zhi ba'i sbyin sreg dang / rgyas dbang drag po gsum dang bcas nyin bdun bar rgyas par byas/ mtshams g.yog blo gsal rang gis byas pas khams bde zhing