[A:492]phyag len ltar grub 'phral kye rdo rje'i rdul tshon gyi dkyil 'khor du dbang bskur ba dag bya dag byed ngo 'phrod pa'i sgo nas shin tu smin pa/ khyad par rdo rje slob dpon gyi dbang gi skabs slob ma re re nas dbang stegs kyi steng du 'jog pa sogs kha'u brag rdzong pa'i bzhed pa 'khrul med dang / dbang gi mtshams sbyor yang brag phug pa dkon mchog rgyal mtshan gyis mdzad pa'i dbang bshad dang / sngags 'chang bsod nams chos 'phel gyis mdzad pa'i 'jigs byed kyi dbang bshad steng nas legs cha bsdus pa'i bshad pa rgyas par byas/ sta gon gyi khyad chos phra mo rnams kyang slob bshad pa'i lugs srol 'khrul med ltar grwa pa yongs rdzogs la 'bul dgos stabs nas zhag bcu skor thogs/ dbang grol nub nas 'khor 'das dbyer med kyi lta khrid shin tu smin pa/ sgro 'dogs gcod pa bdag chen rin po che'i 'khrul spong rab gsal la rtsa ba sbyar ba'i sa gzhung spel nas gzabs bshad rgyas pa/ de grub nas yum gyi rdul tshon gyi dkyil 'khor du mkhan chen ngag dbang chos grags kyi zin bris steng nas dbang bskur ba sngon du 'gro ba'i phyi bskyed rim gyi dmigs khrid/ sgro 'dogs gcod pa tshar chen rdo rje 'chang gis mdzad pa'i phyi bskyed rim gyi rnam bshad legs bshad nyi ma'i 'od zer gyi steng nas bshad pa shin tu rgyas shing mtha' chod pa blo thog nas byas/ de'ang rang nyid mig kha bye ma thag nas sa skya pa'i bstan pa'i sgor zhugs/ khyad par rje bla ma'i zhabs drung du gsung ngag thog mar zhu ba'i dus ngor chen gyis mdzad pa'i bskyed rim gnad kyi zla zer dang / kun du dgos pa'i gzhung bdun blo la byang bar yod gshis gsung bshad rnams blo la nges par byung stabs slob bshad 'chad ces dpa' dpa' mo byed pa rnams dang mi 'dra ba'i gdeng 'dra yod