[A:499]g.yas g.yon yas mas thams cad grwa tshang gdan 'dren gyi bsnyen bkur bzhugs long med pa lta bu byung bas 'dod yon 'di kham ches pas spro sag sag byung / dbyar chos gang du chos ra smar ba rang byed rgyu ma byung bas cung zhig blo kha khengs pa rang ni byung ma song / sngon sbyin gtong bgyis pa'i 'bras bu dang / /yas mas kyi sbyin bdag zhogs 'thabs pas/ /'dod yon gyi longs spyod 'ar ma 'ur/ /ltogs snying bcangs rnams la der rang mkho/ /de nas gsang phu'i dbyar chos bteg /nged rang gsang phu'i grwa rgan du song gshis bla grwa thams cad 'dzoms sar zhum skrag ma dgos shing bshad pa dang rig lung sogs la 'tsher ngad ma dgos par bla gsar 'ga' zhig ltar sbugs 'thums kyi ra bar ma tshud/ 'on kyang de lo zur sprul rin po che'i sku tshab tu me tog mchod pa'i rta hrags la 'gro dgos tshul rdor brag nas bka' pheb pa ma bzlog pas 'gro dgos shar/ yo byad ni brel phongs med par gnang byung bas phyin/ bla ma so sos khri mtho ba'i steng du rgyan sprod gzabs 'chor dgos pa ltar bskor lam chen mor chibs hrags gang gzabs bcas zhang g.yu brag pa'i chas su zhugs nas khri steng du sdod pa las ngag 'don gyi rigs ni tshig gcig kyang mi dgos pas ltad mo che la so bsod pa byung / smras pa/ lar 'jig rten gyi gnas tshul 'di dgod re bro/ /khong yas mas kyi grwa tshang gnyis po ni/ /'chams chas sogs yo byad la bzang 'gran byed/ /stangs stabs dang rnga tshig gi 'ur sgra che/ /khong zhen can rnams blo sems 'tshab ma 'tshub/ /'bag ban ling can rnams ni nyams rtogs 'ur/ /'khur gang yang med tsho ni ltad mo che/ /