[A:119]dring mi 'jog pa'i bstan pa'i mnga' bdag chen por thugs nges 'drongs pa'i yid ches bzlog tu med pa'i rgyu dang / sku gsung thugs gsum ngal dub khyad du bsad de dbus gtsang chu ltar nyul bas yongs 'dzin du ma bsten cing / khyad par rdo rje 'chang rmor chen chos kyi rgyal po'i zhabs pad yun ring du bsten par mdzad de chos skyong ba'i srung ma che chung sogs zab chos rnams bum pa gang byo'i tshul du gsan cing / bsnyen sgrub rnams kyang gang byung gis chog pa'i babs chol dang bshad yam tsam la thugs yid mi gtod par/ brgyud ldan gyi man ngag bzhin du mthar phyin par mdzad pas rdo rje nag po chen po'i zhal mngon sum du gzigs shing / yab mes kyi sku dgra 'ga' zhig tshar bcad pa sogs rtags mtshan mngon sum du ston par mdzad pa'i mthu stobs kyi dbang phyug chen po sangs rgyas rgya mtsho'i zhal snga nas kyis nye bar len pa'i rkyen mdzad par brten/ dpal sa skya pa'i bstan srung dbang po rnams kyi rten gsum brgyud ldan gong ma'i bzhed pa ji bzhin bzhengs par dgongs te/ skyabs mgon dam pa 'di nyid la snyan gsan zhu bar mdzad pa na dus la babs par mkhyen nas zhal gyis bzhes te thun mong dang thun mong ma yin pa'i gzungs sngags sogs ring bsrel rnam bzhi/ rten gyi 'khor lo/ thugs rten gnam lcags kyi rdo rje/ gsang rten gri lcags kyi gwa'u/ seng ldeng gi phur bu sogs nye bar dgos pa'i yo byad rnams kyang ma tshang bar med pa sta gon gyis ljags bsnyen kha gso dang / bzo bo rnams la rgyu dbang / mgon po che chung gi rjes gnang sogs gnang / phrin bcol gyi bskang ba nan tan mdzad/