[A:133]ba ltar mdo smad du pheb pa'i sgo dod de/ yar klung du pheb/ bkra shis chos kyi sder gsang chen 'dus pa'i tshogs kyis rje btsun yid bzhin 'khor lo'i sgo nas zhabs pad brtan par gsol ba 'debs pa'i cho ga rgyas par mdzad do/ /de dag gi don bsdu na/ mdo khams bder bkod dbus gtsang bsti gnas gshegs/ /rten gsum mchod cing 'dar grong gdan sar bzhugs/ /mdo sngags rigs gnas gsan zhing phan dgongs mdzad/ /gnas gsar 'jam mgon thugs bskyed rmad byung yin/ /zhes so/ /de nas/ zla ba drug pa'i nyer dgu gza' tshes phun sum tshogs pa'i nyin ser skya mchog dman mang pos mdun bdar te/ slar yang mdo smad phyogs kyi bstan 'gro'i don chen sgrub pa'i thugs bskyed rmad du byung bas chibs kyi kha lo bsgyur ro/ /de nub sger par bzhugs/ rim bzhin bsam yas su bzhugs/ grub dbang bla ma kun dga' tshul khrims zhes rmor chen rdo rje 'chang gi zhal slob stan thog gcig tu mkha' spyod ma'i ljags bsnyen la lo bco lnga bzhugs shing / me rlung gi nus stobs rgyas pa sogs nyams rtogs kyi yon tan bsam gyis mi khyab cing sku lus kyang smug 'ber rnal 'byor dbang phyug birWa pa lta bu zhig bzhugs pas de nyid mjal ba dang / gtsug lag khang yongs su rdzogs pa'i gnas gzigs dang mchod 'bul rgyas par mdzad/ tshes gnyis kyi nub mo 'od gsal gyi ngang la shel brag gi rgyab ri dang mnyam pa'i grub pa'i dbang phyug chen po thang stong rgyal po'i sku shin tu che zhing brjid pa zhig zhal gzigs shing / de'i sku'i cha thams cad la nu 'bur shin tu mang bar