[A:134]'gro ba du mas nu ba bzhin rje de nyid kyis kyang sku g.yon gyi nu ma bzhos pas grub dbang de'i zhal nas/ khyed kyi sku tshe'i tshad lnga bcu nga bdun yin/ lam 'bras tshar bdun gsungs shig dang bstan 'gro la phan thogs par 'gyur ro/ /zhes dang / rab byung gi bslab pa byang sgo sems bskyed gling gi gtso bo ma chags padma can la phul te rab tu byung ba'i rtags rnams bor nas rnal 'byor spyod pa'i cha byad bzung na sku tshe mdzad phrin mtha' rgyas su 'gro tshul sogs dang / de ltar ma byung na lo gsum nas sku tshe'i bar chad du 'gro tshul gyi lung bstan shin tu mang ba dang / ni guu ma'ang 'dir yod gsungs/ gzigs pas yum drung gi sku rgyan sogs ji lta ba gsal bar gzigs/ rje de nyid kyi bka' las/ phyi nub bla ma mkha' 'gro yi/ /lung bstan yid ches du ma byung / /zhes gsungs pa ltar/ ni gu ma des kyang lung bstan shin tu mang bar mdzad dam snyam yang / skyabs mgon dam pa 'di nyid sba ba kho na lhur mdzad gshis bsnyel tho tsam yang mi snang zhing / zhal slob kyi gsung rgyun 'dra'ang ma thos/ de ltar lung bstan gyi don ltar mdzad na sku 'di nyid kyi sku tshe sogs kyang mthar 'khyol dang / mdzad phrin gong 'phel du 'gyur bar ma zad/ sa lam gyi yon tan skad cig tsam gyis rdzogs pa sogs dgos pa mchog tu che'ang / tshur mthong gi skye bo rnams ya ga dang sgro skur gyi yul dam pa la smad pa'i nyes pa chen po gsog par dgongs nas/ bdag bas gzhan gces kyi thugs rlabs chen bskyed de rten 'brel gyi sna sel du snam sbyar dang lhung bzed byang sgo sems bskyed gling du 'bul ba dang / sku chos sogs rab byung