[A:13]par dka' yang / don gyi slad du mtshan nas smos na/ rigs dang dkyil 'khor rgya mtsho'i khyab bdag rdo rje 'chang ngag dbang kun dga' legs pa'i 'byung gnas theg mchog bstan pa'i rgyal mtshan dpal bzang po zhes snyan pa'i dri bzhon khor yug ri bo'i khongs su'ang rgyu zhing / nam mkha'i mtha' yang gzhal ba lta bur gyur pa gang gi ngo mtshar ba'i rtogs pa'i cha shas tsam yang brjod par rigs pa nyid las/ mi rigs pa'i klan ka'i go skabs cung zad kyang med do/ /de lta na'ang dam pa 'di nyid ni rigs thams cad kyi bdag po/ dkyil 'khor thams cad kyi gtso bo/ drug pa rdo rje sems dpa' nyid dang dbyer mie phyed par bzhugs pas/ gang gi rnam par thar pa mtha' dag ni rab 'byams zhing gi rdul snyed kyi grangs dang mnyam pa'i bde bar gshegs pa sras dang bcas pa rnams kyis bskal pa ganggA'i klung gi bye ma snyed kyi bar du brjod kyang rdzogs par mi 'gyur na/ bdag lta bu byis pa blo gros gzhon nur gyur pa'i so so skye bo dag gis lta ga la zhig /'on kyang ma la ya'i rlung gi cha shas tsam reg pas kyang skye rgu'i tsha gdung sel ba ltar/ rje btsun 'di'i phul du byung ba'i mdzad pa dag gi cha shas tsam bsnyad pas kyang dad pa can dag gi sems kyi gdung ba sel bar 'gyur bar ma zad/ bla med ye shes mchog gi go 'phang rdul bral rnam kun mchog gi rang bzhin de'ang mngon du byed pa'i dngos rgyu bla na med pa dang / 'di phyi'i bde 'bras cig car 'bad med du stsol ba ni gdon mi za ba nyid kyi phyir na/ sngon gyi tshe bstan 'gro'i legs byas kyi me long