[A:146]'dun bsam 'grub gnyis nas sbyin bdag bgyis te/ rnga chen zhes pa chu khyi zla ba lnga pa'i nang nas dpal bsam yas dbu rtse'i bar khang g.yu zhal mthil du/ bco brgyad nas chos kyi rje yab sras/ kha rag bod 'brug chos rje/ nyan po chos rje sku mched/ gling smad zhabs drung / gzhi pa dpon slob/ bkra shis chos sde'i dpon slob sogs phyogs 'dus dang / gnyug mar gnas pa mkhan slob dge 'dun dang bcas pa sogs 'dus pa sum brgya brgal ba la gsung ngag rin po che dbang lung khrid gsum shin tu rgyas pa ste/ tshar gnyis pa dang / gzhan yang mkha' spyod ma dang rta mgrin yang gsang sogs 'dod chos kyang shin tu mang ba dang / ser skya stong phrag brgal ba la theg pa chen po'i sems bskyed/ gsung ngag tshar chos su ser skya shin tu mang bar 'chi med dpal ster gyi khrom dbang bcas stsal/ rab byung grwa tshang gi sbyin bdag sogs spyi sgos rnams kyis gtong ba'i sgo brgya rnam par phye ba'i zang zing gi mchod sprin gzabs rgyas chad med du bstar/ de ltar chos srid kyi 'byor pa rdzogs ldan gyi rjes su snyegs pa la gnas srung chos skyong chen po'ang rjes su yi rangs te/ dam ldan dge bshes kyis rdo rje gdan du chos kyi 'khor lo bskor ba legs shing / 'dre'ang yid spro zhes sogs kyis gzengs bstod dang lha rdzas srid du ring ba phyag mtshan ba dan dang bcas pa phul zhing lus dang grib ma'i tshul du mi 'bral bar phrin las bsgrub par zhal gyis 'ches/ de nas lha ldan brgyud de 'phags sder chibs bskyod/ gnyan mkhar nag gi 'brang la kha btags dri med cig phung nge 'dug par gzhis bdag gi mjal dar yin 'dug /