[A:239]grub mtha' sna tshogs skor gsan pa'i bla ma bcu bzhi bcas sdom bdun cu don gnyis/ gzhan yang cho ga phyag len dogs gcod mdzad pa/ rig gnas skor gsan ba dang dogs gcod mdzad pa sogs/ mdor na mkhas grub kyi yongs 'dzin bsten pa'i rnam thar kyang tshong dpon gyi bu khye'u nor bzang dang / mkhas grub khyung po/ rje btsun rdo ring pa sogs kyi rtogs brjod las 'byung ba kho na ltar ro/ /de dag gi zhal gyi bum bzang las gdams pa'i bcud ngoms par gsol ba/ yang gong gi de nyid las/ so thar byang sems rig 'dzin gsang sngags kyi/ /smin grol zab dang rgya che'i chu 'dzin dbang / /gcig 'dus sgra brgya sgrogs pa las thon pa'i/ /mthu stobs drag po'i rtsal 'chang khyed la 'dud/ /ces gsungs pa ltar/ de dag nyams bzhes kyi phreng ba bstar bar mdzad pa'i tshul yang / sangs rgyas kyi bstan pa'i nyams len thams cad bsdu na sdom pa gsum gyi nyams len du 'du zhing / de'ang bla ma mtshan nyid dang ldan pa rnams nas/ theg pa chen po lugs gnyis kyi cho ga dang / gsang chen bla na med pa gtso bor gyur pa'i rgyud sde chen po bzhi dang 'brel ba'i cho ga rnam par dag pa las nod par mdzad pa las/ so so'i rtsa ba dang yan lag gi bslab bya phra zhing phra ba tshun chad tshul bzhin du bsrung sdom mdzad pa la gus sbyor shin tu che ba'i stobs kyis yul dus gnas skabs thams cad du bstan pa'i mig rgyan la phan pa'i kun spyod kho na mdzad pa'i sgo nas bskyed rdzogs zung 'jug gi ting nge 'dzin las nam yang g.yo ba med bzhin du/ rmor chen chos kyi rgyal po sogs las zab pa dang rgya che ba'i dam pa'i