[A:240]chos ji snyed cig yod pa thams cad lus pa med pa lta bur gsan pa de dag thos blo tsam ma yin par/ bsam byung gi rig pas tshul bzhin du dpyod de dka' ba'i gnas phra mo tshun chod la sgro 'dogs chod par mdzad pas 'chad sgo gang mdzad kyang thogs med kyi spobs pa mchog tu gyur cing / rdo rje theg pa gtso bor gyur pa'i lam dri ma med pa rnams rgyun gyi nyams bzhes khrigs chags su mdzad pa dang / chos mthun gyi mdzad spyod gzhan yang ji ltar mdzad pa'i tshul 'dir mtshon pa tsam zhig brjod na/ thog mar tho rangs nyams bzhes kyi gtso bo lhag pa'i lha gang yin de'i ldang ba'i rnal 'byor gyis bzhengs nas/ tshe sgrub zab mo'i rim pa dang / gsung gtor/ rje btsun sa skya pa'i thugs dam chag med bzhi/ gur zhal dmar po skor gsum sogs gsang sngags gsar rnying dang 'brel ba'i zhi khro rab 'byams kyi dkyil 'khor du ma zhig gi nyams bzhes dang / lha bsang / gtor bsngo/ bskang ba sogs bstan 'gro'i ched lugs zung dang 'brel ba'i mdzad phrin thugs g.yeng chung skabs nyin mtshan 'khyongs pa lta bur mdzad kyang rkang grangs ji lta ba bzhin dngos su gsungs pa dang / zin thor thebs pa mi snang / dper mtshon na kho bos phyag rdor utsArYa sogs kyi sngags la zhu dag zhus par/ 'di sogs las sgrub kyi sngags du ma zhig rgyun par bzlas brjod byed pa yin gsung ba la dpag na bsgom bzlas kyi rim pa du ma thugs nyams su bzhes tshod du 'dug cing / de dag kyang ming rkyang tsam ma yin par thugs dam gzhi'i bsnyen pa dang / rgyun bsnyen sogs/ mdor na bsnyen sgrub las gsum gyi rigs phal cher sla