[A:257]kyis dka' gnad kyi don la dogs gcod gang zhus pa rnams la mtha' chod cing don 'grel ba'i gsung gis the tshom dang / log rtog gi dri ma bsal te/ nges pa'i don la sbyor bar mdzad pa ni dpyod ldan gzur gnas kun la mngon du gyur pa yin la/ gsum pa rtsom pa nyin mor byed pa'i 'od phreng gis bstan pa'i pad tshal rgyas par mdzad pa'i tshul ni/ tshig rgyan gyi bstan bcos me long las/ snyan ngag dam pa'i rgyan 'di ni/ /bskal pa'i bar du gnas par 'gyur/ /zhes gsungs pa ltar/ rtsom pa po tshad ldan gyis bskrun pa'i bstan bcos rnams ni/ ma 'ongs pa ji srid bstan pa gnas kyi bar de srid du rgyun ma nyams par gnas pas bstan pa yun ring du mi nub pa'i rgyu dang / mkhas pas yang dag sbyar ba yi/ /ngag ni ngag gi 'dod 'jor bshad/ /ces gsungs pa ltar/ bla ma rgyal ba sras dang bcas pa'i sku gsung thugs kyi yon tan brjod pa dang / rgyal ba'i bka' dri ma med pa dag gi dgongs don gsal ba'i phyir dgos sogs chos lnga ldan las brtsams te 'phags yul gyi gnas lnga rig ba'i paNDi ta chen po rnams la grags pa ltar sdeb sbyor gyi gtsug lag dang mthun par brtsams nas/ rtsom pa kho na la brten nas lhag pa'i lha zhal ston pa dang / chos kyi gnas lugs mngon sum du mthong ba la sogs pa rang don phun sum tshogs pa 'grub cing / don du gnyer ba gzhan dag yul mchog la ma dad pa dad pa dang / dad pa rnams phyir zhing 'phel bar 'gyur ba dang / mdo rgyud bstan bcos dang bcas pa'i dgongs don bde blag tu rtogs nas gzhan la'ang tshul bzhin