[A:258]du ston nus pa'i spobs pa dge ba sogs gzhan don 'bad med du 'byung ba'i 'dod 'jor yang bshad cing / yang sdom gsum rab dbye las/ mkhas rnams dga' ba'i sdeb sbyor ni/ /blun po rnams kyis go dka' bas/ /tshigs gi sbyor ba spangs nas kyang / /kun gyis go bar bya phyir bshad/ /ces gsungs pa ltar/ sgra dang / sdeb sbyor dang / snyan ngag dang / ming gi mngon brjod/ tshig gi rgyan la sogs pa rnams ni rig pa'i gnas lnga la mkhas pa'i skye bo dag gi 'jug ngogs yin kyang / de las gzhan don gnyer blo dman pa dag la phan pa'i rngo mi thogs pas mkhas blun thun mong ba'i blo gros kyis dpyad byar 'os pa'i chos ni snyigs ma'i dus 'dir phan yon gyi sgo nas gzhan las khyad par du 'phags par 'khums la/ de ltar na bstan pa rin po che rgyun ring du chags pa'i slad dang / don gnyer yongs la phan pa'i thugs bskyed zla med pas nye bar drangs te legs par gsungs pa'i bstan bcos tshig don 'brel chags shing kun gyi blo yul du 'jebs par 'char ba'i rtsom pa ni thub pa'i bstan pa 'dzin pa'i rgyu tshogs bla na med pa ste/ de lta bus phan 'bras phul du byung ba thams cad kyang bdag cag gi rnam 'dren dam pa 'di'i rmad du byung ba'i thugs bskyed dang / dri ma med pa'i mkhyen rab zung 'jug gi chu gter chen pos nye bar bskrun pa'i legs bshad phan bde padmo'i gnyen du gyur pa 'di dag la gnas pa gzhir bcas kyang / sngon gyi yi ge rnying pa rnams 'phel rgyas la dgongs/ gsung rtsom gyi rigs kyang cher ma mdzad cing / mdzad pa rnams kyang gab dkrugs dang 'don mi bde ba sogs bsal bar mdzad cing /