[A:39]bar gshegs pa'i dus su bkod pa mi 'dra ba gnyis mdzad pa'i tshul yab sras gnyis po de'i rnam thar du gsal ba dang mtshungs shing / gzhan yang de 'dra'i rigs can mang du snang bas so/ /gzhan yang bla ma sa skya pa chen po gzhon nu'i skabs/ grub pa'i dbang phyug gnang kha'u pas sku pang du bzhes nas/ 'di ni nges par spyan ras gzigs sam/ byang chub sems dpa' sbyin pa'i dpal nyid yin la/ rnal 'byor dbang phyug nyid du'ang mi 'gal ba yin no/ /zhes gsungs pa 'dis ni slob dpon chen po nyid du'ang mi 'gal bar bstan pa yin te/ slob dpon chen po ni 'phags pa spyan ras gzigs nyid yin zhing / de dang rnal 'byor dbang phyug mi 'gal bar gsungs pa'i phyir dang / sngar smos pa ltar rje nyid/ rje btsun chen pos rtse mor bstod pa las/ 'jam pa'i dbyangs dang byams mgon dbyer med pa'i/ /bla ma mchog dang dam pa khyod nyid la/ /khyad par 'ga' yang bdag gis yod ma shes/ /zhes sogs dri ma med pa'i lung gis grub pa'i phyir ro/ /de dag gi don bsdu na/ dang por chos longs sprul gsum rdzogs sangs rgyas/ /bar du byang sems mkhas grub bzang rim pa/ /tha mar khyab bdag bka' 'gyur mtshan can sogs/ /gnas gsar 'jam mgon bla ma'i 'khrungs rabs yin/ /zhes so/ /de ltar bshad ma thag pa'i sprul pa'i sku'i bkod pa ji snyed cig bstan pa de dag gis mdzad phrin bla na med pa'i rgyun slar yang spel nas snyigs dus kyi bstan 'gro'i dpal mgon mdzad par bzhed de/ ngur smrig gi bla gos 'chang ba'i rnam rol du bstan nas rgyal