[A:38]bshad pa de dag las 'phros nas sku phreng kho na'i rnam thar kyang bsam gyis mi khyab pa yod par sems so/ /'o na bdag cag gi ston pa dang 'phags mchog spyan ras gzigs gnyis ni sangs rgyas zin pa dang / rab gsal dang bzang skyong gnyis ni rgyas 'gyur yin pa dang / 'phags mchog spyan ras gzigs rnal 'byor dbang phyug yin pa sogs mi 'gal lam snyam na/ mi 'gal te/ spyir sa dang po'i byang 'phags rnams kyis kyang / zhing khams brgyar chos gsan pa dang / zhing khams brgyar chos ston pa sogs yon tan brgya phrag bcu gnyis la dbang bsgyur na/ de bas lhag pa rnams la lta ci smos te/ sangs rgyas dang byang sems chen po rnams ni dbang bcu dang sprul bsgyur la mnga' brnyes pas gang 'dod du skye ba len nus shing / de'ang gcig nyid mang por sprul ba dang / chung ngu chen por bsgyur ba sogs nus pas na/ sku'i skye sprul gnyis cig car du sprul nus pa la the tshom ci zhig dgos te/ bla ma sa skya pa chen pos tshar khar khrid skyong ba/ sa skyar gsung ngag gsungs pa/ gung thang du mal gyi nye gnas mdzad pa/ 'gring mtshams su rab gnas mdzad pa/ zang sdong du lam 'bras gsungs pa/ shab sgo lngar chos 'khor bskor ba ste/ sku'i bkod pa mi 'dra ba drug dus gcig la bstan cing / gzugs sku bsdu ba'i tshe'ang / bde ba can dang / po ta la sogs su gshegs pa'i bkod pa mi gcig pa lnga cig car ston par mdzad pa dang / de bzhin du rje btsun rtse mos kyang zhi