[A:55]'grel las nyi sgrol byed/ tsi ni'i skad du gya shin/ dbang thang dang bstun pa'i shing pho spre'u'i lo/ /'byung ba sum ldan/ kha ral/ bkra shis kyi klung / pho brang gling dgur yul lha'i me long gnas pa'i lo/ /bdag cag gi ston pa mnyam med shAkya'i rgyal pos mu stegs tshar bcad pa sogs ngo mtshar ba'i cho 'phrul du ma bstan pa'i dus bzang / rta zla'i nang du yum gyi lhums su zhugs ma thag nas yum gyi sku'i zo mdog bzang zhing / thugs la sngar med pa'i dga' bde khyad par can 'khrungs pa dang / mnal lam bzang po kho na byung tshod du 'dug kyang / de skabs su thugs 'dzin dang zin bris ma thub pas 'dir gsal bar bkod ma nus/ de ltar mngal gyi zla ba yongs su rdzogs nas/ lo de'i nus ldan gyi dus/ rta bdun dbang po gzhu khyim du spyod pa'i skabs/ smal po zla ba ste/ sngon gyi dus 'jam dbyangs kyi rnam sprul slob dpon rin po che bsod nams rtse mo dang / chos rje khu dbon/ khyab bdag bka' 'gyur ba chen po dang thugs rgyud gcig pa'i 'jam mgon a mes zhabs sogs mkhas grub kyi skyes bu du mas zung 'jug gi go 'phang mngon du mdzad de byin gyis brlabs pa'i dus chen rnams dang 'dab 'byor/ dmar phyogs rdzogs pa gnyis pa ste/ tshes nyer lnga/ dus 'khor ba'i dbyangs A: gsal byed pa/ 'byung ba nam mkha'/ 'dod yon sgra/ dbyangs 'char rgyud las gsungs pa'i dbyangs au/ gsal byed Tha/ 'byung ba nam mkha'/ 'dod yon sgra/ dar gud smin pa/ res gza' nam mkha'i tog gam bcu gnyis bdag po/ yang dag pa'i lam las drangs pas dar ba/