[A:65]khrid/ gshed dmar skor zab cing thugs gtsigs che ba'i dbang khrid lung sogs shin tu mang bar gsan/ 'di skabs li'u thang gi khams btsun ngag dbang legs bshad zer ba zhig gis gcod yul skor zhus pa'ang lhan cig tu gsan/ chos mtshams gung seng skabs sku rtsed kyi rnam pas/ bla brang steng na grwa gzhon 'ga' zhig la gcod khrid kyi dmigs pa 'phogs pa'i tshul mdzad pa na tshig zur tsam yang ma nyams par byung bas/ rmor chen rdo rje 'chang gis gsan pas thugs lhag par mnyes/ byis pa rnams kyis byi'u dang byi ba sogs bzung nas srog bslu zhus nas skur mnabs pa'i na bza' sogs kyang srog bslu'i yon du ster bar mdzad/ lan cig byis pa zhig gis ske rags slong mo zhus par/ zhabs drung gzhon nu nyid kyi sku rags gser sked de gnang bar/ dge rgan gyis rtsad gcod zhus pas sngon du cang mi gsung zhing / rjes su slong mo bar ster dgos byung bas bya thabs ma rnyed ces gsung ba sogs mdor na bdag bas gzhan gces kyi thugs bskyed rlabs po che de lta bu ni/ sbyor ba'i sngon du snying rje dang / /zhes sogs ltar/ gzhan rkyen la mi ltos par rang chas su yod pas/ tha na khab skud tsam gyis mtshon pa'i dngos po che phra ci yin yang zhuu mkhan byung na de 'phral gnang / dge rgan sogs kyis rtsad gcod zhus na lan ci'ang mi gsung ba sogs la 'di ltar gnang tshe mgo mi 'thon zhes zom po'i skur 'debs dang / skabs 'gar ha cang rgod drags pas/ 'di ni mtha' gnyis su 'gyur zhes kun gsal yangs pa'i tha grur byis blo'i sbar tshod 'debs mkhan 'dra'ang byung bar grags pa ni shes bya lkog tu gyur pa dag gi khyad par gyi chos yang dag pa'o/