[A:8]pha dang ma/ /'di nyid yid la bsam par bya/ /zhes pa dang / gang phyir ye shes rdo rje ni/ /mnyes pas myur du 'thob par 'gyur/ /de phyir slob dpon drung gshegs te/ /de bzhin gshegs rnams phyag mdzad do/ /zhes bya ba la sogs pa rgya cher gsungs pa ltar/ thar 'dod rnams la ma nor ba'i lam tshul bzhin du 'doms par mdzad pa'i bshes gnyen dam pa zab mo'i smin grol gyi bka' drin stsol bar mdzad pa'i mtshan nyid dang ldan pa'i rdo rje slob dpon dag ni ji ltar na mtha' klas pa'i nam mkha'i khyon gyis gzhal ba'i skye rgu rnams kyi nyer 'tsho'i dbang por gyur pa/ gting dpag dka' ba'i thugs bskyed dang smon lam gyi chu mtsho las legs par 'ongs shing / tshogs gnyis rlabs po che'i dri bzhon gyis nye bar drangs te/ sgrib gnyis chu ldan gyis dben pa'i chos sku bde ba chen po'i mkha' dbyings su legs par son nas/ gzugs sku rnam gnyis kyi rol rtsed zla nyi'i dkyil 'khor rmad du byung ba las/ ris med pa'i phrin las kyi 'od zer grangs med pa dus rtag tu 'phro zhing 'phro ba'i ngang tshul can gyi bde bar gshegs pa rnams kyi ye shes kyi zlos gar las gzhan du med pa'am/ yang na rgyal ba nyid kyang rdo rje slob dpon chen po dag gi rnam par rol ba las ma 'das pa nyid yin la/ de lta bu'i rgyal ba'i dbang po rnams ni nam yang zab mo chos kyi sku nyid las g.yo ba med bzhin du ji ltar yid bzhin gyi nor bu rin po che dbang gi rgyal po dang / dpag bsam gyi shing ljon pa las 'dod rgu mtha' dag rtsol med du rang 'byung ba'am/ nor bu chu shel dri ma med pa