[A:413]drin che bas nyin phyed yan la gsal 'gyur med kyang de nas je zhan gyis gnas slob de spyan chab mdzad bzhin par rje nyid kyi sku drung du byung bas/ thugs skyong ngal gyis gsung chen po shor byung zhes bka' stsal/ de mtshams nas gzim chung du phebs dgos kyi bka' bzhin mdzad pas gzhan rnams zhabs brtan gso 'debs mdzad mu dang / mdzod 'dzin des snyan sgron mang du zhu ba'i skabs yab rje mchog nas rje rdo rje 'chang nyid la spyan cher gyis gzigs nas/ sna'ang grang mor song ba dang dbugs 'di'i stabs bcas nam phyed tsam las mi thub pa 'dra gsung bas thugs 'thor nas ci mdzad gtol med ltar gyur pa'i sgo nas bzhugs gnas su byon te/ gsol 'debs la rtse gcig tu thugs gzhol ba'i skabs su gzim chung zangs drar 'od 'khyug pa dang / zangs dra skad 'byin pa sogs rje rdo rje 'chang nyid kyis mngon sum du gzigs pas dpa' bo mkha' 'gro'i bsu ba yin par thag chod dgongs pa 'khrungs / gang ltar yab rje rdo rje 'chang nas rtogs ldan chos nyid rang grol byon byung bzhugs stan things gsungs pa yang yang phebs mu'i thor 'go ma zin tsam la zhing 'di'i gdul bya re zhig rdzogs te/ dag pa chos kyi dbyings kyi ngang du bde bar gshegs pa'i tshul bstan 'phral/ dbu las rlangs pa skya bun gyis byung bas dbu zhwa'ang chu rgyun can du gyur pa dang / de nas spur chas rnams gsol te mchod rdzas dbus su bzhugs su gsol/ nyer drug nas rje rdo rje 'chang sku mched sogs kyis gnas bcur dgongs rdzogs bla mchod bka' drin che zhing / de'i tshe spyir dbyar dus dang / sgos paN chen thams cad mkhyen pa'i mchog sprul rin po che gang gi gdan sar phebs nye'i stabs mi dbang chen po sogs gtsang phebs dang / lhag par dgongs bskor ma 'gugs par gsang rgya dam por mdzad/