[A:416]dang / byin rten phran bu/ gdung 'gyed sogs gang 'tshams mdzad cing / gzhan yang zhal thang kha shas/ dus ja/ dus dran mchod 'bul/ kye rdor sgrub mchod/ ser 'du bcas so so'i dkar chag dang / gtong debs su gsal ba bzhin zab dgongs chos dbyings de bzhin nyid du rdzogs thabs thugs bskyed spyi bye brag mang du mchis kyang 'dir de tsam mo/ /rgyas pa ni yab rje de nyid kyi rnam thar du gsal zhing / de nas rje nyid kyis gdan sa chen po'i sbyin bdag 'ga' zhig la grub thob dang grub rgyal gyi tshe dbang tshar kha shas yang dag par stsal ba'i dus su tshe chang phyogs kun tu lud par gyur to/ /de dag gi don bsdu na/ kye ma skyabs gcig mahA gu ru'i sku/ /zho 'thungs rus skyes rdo rje'i rang bzhin de/ /snyigs ma'i rang mdangs chos bdud 'thab mo las/ /rten 'brel sgo brgyas bzlog pa'i gnas ma gyur/ /mkha' 'gro'i dbang phyug sgyu 'phrul gshog rgyangs kyis/ /sa 'di'i snod bcud dor nas dag pa'i mkhar/ /gshegs pa'i rjes su sku gdung za ma tog /bsod nams rten du stsal ba'ang ngal bso'i grogs/ /dgongs zab chos dbyings de bzhin ro gcig tu/ /je cher mngon par rdzogs pa'i phyi nang rten/ /ring bsrel rnam bzhi'i gang bu gsar bskrun gyi/ /bka' gsang 'doms mkhas rgyal sras sems dpa' che/ /dag snang 'od gsal nam mkha'i dkyil 'khor nas/ /gdod ma'i mgon po'i rang zhal chu 'dzin g.yos/ /byin rlabs zim char kun gzhi'i sa gzhi'i ngos/ /byon 'phral bde stong gsos kyi ngang du 'byams/ /ye shes byin zas sbyangs pa'i gdung rus dum/ /slar 'byung rten 'brel brda ni 'di na ho/ /sngags 'chang rgyal sras mchog gi ngang tshul gyis/ /'gran bral 'khon rigs spel zhes 'doms min nam/ /zhes kyang smras so// // ! dgung grangs bcu bzhir phebs pa chu khyi lor thar rtse rdo rje 'chang nam mkha' bsam