[A:418]kun tu'o/ /dbyug zla'i nang rje btsun sa skya pa'i yab chos bcom ldan 'das snying po kye rdo rje man ngag lugs kyi smin byed kyi dbang cha lnga zhal ngo rnams dang / las tshan khag /chos gra nyi zla zung gi dge 'dun bcas la stsal ba de ni smin byed kyi dkyil 'khor du zhal slob rjes su bzung ba'i sgo dang po dang / mgo zla'i dus mdos chen mo'i tshogs dpon gyi thugs khur yang bzhes shing / brag rtsa rdo rje 'chang blo gsal bstan 'dzin rgya mtsho'i sku drung du dbang / rjes gnang / lung sogs mang du gsan/ de nas sde dge dpon bsod nams mgon po chibs bskyod kyis nyer bdun nyin gdan sar 'byor nas dus mdos ma grol bar gang mtshams kyi bdag rkyen yang dag par bka' gsang gis gdams so/ /de dag gi don bsdu na/ bag yod so thar khrims kyis sgo gsum mdzes/ /yab mes lugs bzang 'khrul med don ldan bskyangs/ /skal ldan smin grol lam gyis rjes su bzung / /rten 'brel mchod yon nyi zla'i dkyil 'khor rgyas/ /zhes kyang smras so// // ! dgung grang bco lngar phebs pa chu phag rgyal zla'i 'gor/ gang gi mdo smad sa skyong chen po nas zhal rgyas kyi dga' ston dngos 'bul rmugs 'dzin dbang po'i gan mdzod zhal dbye ba lta bu sngon 'gro'i legs skyes gya nom pa stob par mdzad/ skabs 'dir zhu 'os 'di dag kyang gleng ste/ rje rdo rje 'chang chen po de nyid ni bla ma gong ma rnams kyi rnam thar la zang zing gi dngos 'bul 'di dang 'di zhes brjod nyog can du so sor mang du smos pa dang / don yod med la ma ltos par skye bo phal pa mang po'i ming bkod pa dang / brjod don bla ma de de'i ngo mtshar med pa'i rjod byed mdzes mtshon can dang / ngo mtshar che chung ji ltar yang yin lugs drang po de mi bkod par a pha'i gsol zhal gtsang ma'i dpe bzhin sgro btags mang du bsnyad pa rnams