[A:450]skabs dang / de'i tshe de'i dus su gdan sa'i lugs zung gi mdzad sgo rnams 'jam mgon mthu stobs kyi mtshan can mchog nas gang gi bka' lung gi khur bzod par mdzad cing / de lo mes srong sde pa kun phan dam chos rgyal mtshan la gnang rgyu'i gur gyi bris thang thun mong ma yin pa zhal bkod gnang skabs sngar gyi gur lha brgyad steng / dmag zor rgyal mo be con thod khrag lte ba'i thad kar mgo sprod du bzung ba zhig 'khrungs pa'i khrod nas dbu mdzad dbang phyug chos 'byor yin snyam pa zhig gis byang sems dkar po ka pA la gang rje nyid la phul ba dang / gzhan yang gnyan mgon zhal bzhi pa'i skor la gzigs snang ngo mtshar can mang dag yod gsung ba las chos skyong bka' gnyan pas reg zig dang bral zhing dpal mgur las kyang ma grol/ 'chi bdag las kyi gshin rje phur khang gi sgo tshad dang mnyam pa zhig kyang bka' nyan pa'i tshul gyis gzigs so/ /de dag gi don bsdu na/ gzhis byes zhing sar chos char rjes thob tu/ /dbang phyogs sa 'dzin phrag nas nye zho yi/ /chu 'dzin dbyings dag mtshams sprin bla gos can/ /phan bde'i tsha zer g.yo ba'i snang byed 'khrungs/ /de tshe dan stod gzim spyil dga' tshal du/ /phyogs las rnam rgyal ru mtshon 'dab brgya'i phon/ /rten 'brel byin rlabs dri bsung 'thul bzhin par/ /bstan srung dgyes pa'i mchod rdzas nyid du grub/ /mngon gyur sar chags bi rU'i gdams ngag gnang / /stan gcig lha sngags rol pa'i bde stong dang / /mnyam du chas pa'i bka' nyan srung ma rnams/ /ci gsung sgrub par zhal bzhes bla ma rje/ /zhes kyang smras so// // ! dgung grangs nyer gsum pa lcags lug snron zla'i nang kye rdo rje'i ljags bsnyen grol