[A:315]gzigs: don la song zhig brda yis bskul ba las: bi ma mi tras brda thim lan gsum gsungs: gdan 'dren gsum gyis brda yi skad gcig la: go lugs ma gcig brda skad gsum du go: gru bo dag la brten pa'i mi: skyes bus skya bas rtsol phod na: grus kyang pha rol phyin par 'gyur: gcig gis de ltar go ba'i dus: gcig gis go lugs 'di lta ste: gzhu mo dag la brten pa'i mda': skye bus mtheb mdzub rtsol phod na: mdas kyang 'ben ngor phyin par 'gyur: gcig gis 'di lta go ba la: rig pa dag la brten pa'i mi: skyes bus 'du shes bskyod phod na: lus kyi bum pa gang 'dril ba: sems kyi chu bo de ru 'pho: bod du 'byon par zhal gyis bzhes: gdan 'dren gsum gyis gdan 'drongs te: bsam yas mthil du phyag phebs nas: rgyal blon 'khor dang bcas pa yis: 'dod yon lnga yis mnyes par mdzad: dge ba'i bshes gnyen paNDi ta: lnga brgyas dbang bskur thob pa'o: zhes gsungs pa ltar/ paNDi ta lnga brgya'i nang gi mchog tu gyur pa dri med bshes gnyen chen po de nyid kyi sku che ba'i lo rgyus dang // // ! de nas grub pa mchog gi sar zhugs lha lung dpal gyi rdo rje zhes grags pa de nyid ni/ sngon bskal pa dpag tu med cing bgrang ba las 'das pa'i snga rol na/ de bzhin gshegs pa 'od dpag tu med pa'i drung du/ byang chub sems dpa' sems dpa' chen po 'phags pa spyan ras gzigs dbang phyug gis/ sems can thams cad 'khor ba'i 'dam nas 'don par smon lam btab nas/ 'gro ba dpag tu med pa 'khor ba'i rgya mtsho las bsgral te/ pho brang ri bo po Ta la'i rtser byon nas/ da ni sems can cig kyang med do