[A:518]gcig ring rnam 'dren dam pa gnas gsar rdo rje 'chang chen po'i sku drin gsab ched dang / rje btsun sa skya pa'i sde bstan pa gdung brgyud dang bcas pa'i sku rim du rwa tshar thun mong ma yin pa'i lugs dpal rdo rje 'jigs byed bcu gsum ma'i sgrub mchod brgya tshar grangs gsog mdzad skabs kyi chu stod zla ba'i tshes bcu gcig nyin gnas gsar rdo rje 'chang zhi bar gshegs pas dgongs rdzogs kyi'ang go chod byung ba sogs lkog gyur rjen gsal gyi thugs mkhyen yin pa la ni bsnyon du med cing / dgung zhag nam rdzogs par mkha' spyod ma'i sin dkyil sgrub mchod chag med kyi sngags sdom oM gsum ma nyi khri dgu stong bzhi brgya tham pa/ sku bstod lnga stong nyis brgya go gnyis/ mchog sprul myur 'byon zhe dgu rnams mdzad cing / de lo ga ya dha ra'i bum chu'i snod gas pa dang bsam brling lha mchod dus gur kar chag pa rnams ni dbu bla 'di zhing khams brje ba'i rtags dang / rje de nyid ni rnam kun nyin mtshan khor yug tu bstan 'gro'i don 'ba' zhig gis dus 'da' ba las rnam g.yeng gi dri ma phra mo tsam gyis ma gos kyang / 'jam mgon gnas gsar ba de nyid gshegs pa nas bzung srod tho rengs nyin par gung tshigs skabs sogs yud tsam re bzhugs skabs thugs la skyo shas dang / khyad par da ni rje btsun gong ma'i thugs dam chag med kyi rim pa kha gso ba rnams kyang zhu yul shin tu dkon pa 'dug dgongs pa'i thugs 'dun dung dung lhang lhang bcas nges 'byung gting nas 'khrungs pa'i zhal 'don dge sbyor la rgyun las kyang thugs brtson gyis rtsa ba'i bla ma dam pa rnams kyi dgongs rdzogs dang skye 'gro sems can thams cad kyi don du smin rgyas mdzad/ rje de'i dgongs rdzogs dang bstun lo re bzhin 'jigs byed bcu gsum ma'i rdul dkyil sgrub mchod shom rgyas pa dang bcas zhag bzhi'i khongs su ya ma rA dza bzhi stong brgal tsam dang / gsol 'debs bzhi brgya lhag tsam re mdzad cing phyi lo dus chen nyin dpal sa skya'i lha chen thig g.yab