[A:583]mthun 'gyur gyi rkyen sogs de dus su ma zad rnam pa kun tu ya nga ba dag gzigs tshe spyan chab g.yo ba tsam gyi snying rje'i kun slong dang bcas/ rlabs chen byang chub sems dpa' chen po'i mdzad pa kho nas dus 'da' ba 'di dag ni/ ji skad du/ phan par bsam pa tsam gyis kyang / /sangs rgyas mchod las khyad 'phags na/ /sems can ma lus thams cad kyi/ /bde don brtson pa smon ci dgos/ /zhes dang / bkur bar 'os pa legs khur zhing / /mgon med rnams la lhag par byams/ /byas la drin lan mi brjed pa/ /dam pa rnams kyi mdzad spyod yin/ /zhes sogs gsungs pa ltar lags/ de nas sngon dus 'jam mgon a mes zhabs dang yab rje ratna'i mtshan can gyi sku thog sogs la dpa' bo dpa' mor rdor legs sogs khog zhugs kyis ngan gtad 'don srol 'dug pa de bzhin gyi bka' gsang mdzod 'dzin sogs la grol nas/ bdun phrag gcig ring rje nyid sku tshe'i sgrub par bcad rgya mdzad pa dang / 'jam mgon sku gdung bgres pa snron zla'i tshes mgor gsan sbyong gi thog ma gnang rgyu'i sku rim du/ 'jam dbyangs rtsod rgyal ma spyan 'dren gyis mchod shom rgyas pa dang bcas/ 'jam 'don bskang bshags/ sku khrus sogs la thugs brtson dang / bde gling tshogs yongs 'phral nas gtsug lag khang byings la rab tu gnas pa zhag 'ga' stsal/ tshes gsum nyin yon tan kun gzhi yi ge'i ma mo 'dzin chos bcas 'bul gnang gi sngon 'gror/ sku gsung thugs rten sogs kyis jeng drangs/ phan bde 'byung ba'i sogs bstan bstan 'dzin yun brtan sku tshe rgyas shing / gzhan don 'grub pa'i thugs smon dang / khyad par/ sgrub dang sun 'byin gsal ba'i nyi 'od kyis/ /zhes sogs kun mkhyen chen po'i tshad